RF o‘zbek haydovchilari uchun bo‘lish muddatini 180 kungacha uzaytirdi

Toshkent, O‘zbekiston (UzDaily.uz) — O‘zbekiston Respublikasi Bosh vaziri o‘rinbosari Jamshid Xo‘jayev Rossiya Federatsiyasi Hukumati tomonidan transport-logistika sohasi va eksportchilarni qo‘llab-quvvatlashga qaratilgan qaror qabul qilinganini maʼlum qildi.

Yangi qoidaga ko‘ra, professional haydovchilar Rossiya hududida kalendar yil davomida amaldagi 90 kunlik cheklov o‘rniga 180 kungacha bo‘lishi mumkin.

O‘zgarishlar 2026 yil 30 iyundan kuchga kiradi va xalqaro avtomobil tashuvlarini vizasiz rejim doirasida amalga oshirayotgan O‘zbekiston, MDHning boshqa davlatlari va Gruziyadan bo‘lgan professional haydovchilarga tatbiq etiladi.

Xo‘jayevning taʼkidlashicha, avtomobil transporti O‘zbekiston mahsulotlari eksportida, jumladan qishloq xo‘jaligi tovarlari, oziq-ovqat mahsulotlari, qurilish materiallari va boshqa mahsulotlarni yetkazib berishda hal qiluvchi ahamiyatga ega.

Maʼmuriy cheklovlarning qisqarishi logistika zanjirlarining barqarorligini taʼminlash, yetkazib berishlarning muntazamligini oshirish va milliy ishlab chiqaruvchilarning tashqi bozorlarda raqobatbardoshligini kuchaytirish imkonini berishi qayd etilmoqda.

Ushbu masala 2026 yil birinchi choragida Hukumat komissiyasining ochiq muloqotlari doirasida tadbirkorlik jamoatchiligi tomonidan bir necha bor ko‘tarilgan. Jumladan, meva-sabzavot mahsulotlari, oziq-ovqat sanoati va qurilish materiallari eksportchilari bilan uchrashuvlarda bu tashabbus Rossiya Federatsiyasidagi O‘zbekiston elchixonasi ishtirokida hukumatlararo darajada ishlab chiqilayotgani taʼkidlangan edi.

Yangi tartibni qo‘llash uchun haydovchilar Rossiyaga kirish va u yerda bo‘lish bo‘yicha tegishli ariza topshirishlari talab etiladi.

Hukumat taʼkidlashicha, qabul qilingan qaror logistika jarayonlarining bashoratliligini oshirish, yetkazib berishlardagi uzilishlar xavfini kamaytirish va barqaror eksport oqimini kengaytirish imkonini beradi.