Qirg‘iziston asal ishlab chiqaruvchisi O‘zbekiston bozoriga chiqmoqda

Toshkent, O‘zbekiston (UzDaily.uz) — Qirg‘iziston Respublikasi Iqtisodiyot va tijorat vazirligi huzuridagi Qirg‘izistonning O‘zbekistondagi Savdo vakolatxonasi «Medovaya Artel» MCHJ kompaniyasini O‘zbekiston bozoriga olib chiqish bo‘yicha amalga oshirilgan ishlar natijalari haqida maʼlum qildi.

Ko‘rsatilgan ko‘mak doirasida Savdo vakolatxonasi kompaniyaga kompleks xizmat ko‘rsatgan bo‘lib, jumladan O‘zbekistonda yuridik shaxsni ro‘yxatdan o‘tkazishda yordam, biznes yuritish masalalari bo‘yicha maslahatlar hamda mahalliy qonunchilik talablari va bozor sharoitlariga moslashishda ko‘mak berildi.

Bundan tashqari, Savdo vakolatxonasi ko‘magida 2026 yil 9 aprel kuni «Medovaya Artel» uchun Toshkentdagi Food City savdo majmuasi hududida savdo maydonini ijaraga olish bo‘yicha shartnoma imzolandi. Bu qirg‘izistonlik ishlab chiqaruvchi mahsulotlarini chakana savdo orqali sotish va O‘zbekiston bozorida ilgari surish uchun sharoit yaratadi.

Yaqin istiqbolda tabiiy asaldan iborat taxminan 4 tonna hajmidagi birinchi eksport yetkazib berishlarni tashkil etish rejalashtirilmoqda.

Loyihaning amalga oshirilishi Qirg‘izistonning eksport salohiyatini kengaytirish va O‘zbekiston bilan savdo-iqtisodiy hamkorlikni mustahkamlash yo‘lidagi muhim qadam sifatida baholanmoqda.

Savdo vakolatxonasi mahalliy ishlab chiqaruvchilarni tashqi bozorlarga chiqishda qo‘llab-quvvatlash, eksport yetkazib berishlarni kengaytirish hamda ikki davlat o‘rtasidagi iqtisodiy hamkorlikni rivojlantirish bo‘yicha ishlarni davom ettirishini maʼlum qildi.