Qashqadaryolik fuqaro qurolli mojaroda qatnashgani uchun sudlandi
Toshkent, O’zbekiston (UzDaily.uz) — Yakkabog‘ tuman jinoyat ishlari bo‘yicha sudi O‘zbekistonning 31 yoshli fuqarosi A. M.ni yollanma jangchilikda aybdor deb topib, uni uch yil muddatga ozodlikdan mahrum qildi.
Ish materiallariga ko‘ra, erkak 2022 yil dekabr oyida ishlash maqsadida Rossiyaga ketgan. Keyinchalik u giyohvandlik vositalarini saqlagani uchun sudlanib, 9 yil 6 oy muddatga ozodlikdan mahrum etilgan.
Sudlanuvchining aytishicha, jazoni o‘tash davrida uni Rossiya va Ukraina o‘rtasidagi jangovar harakatlarda ishtirok etishga majburlashgan, jazoni ijro etish muassasasida unga bosim o‘tkazilgan va bir necha bor jarima izolyatoriga joylashtirilgan. Natijada u 2025 yil avgust oyida bir yillik harbiy xizmat shartnomasini imzolagan.
Uning so‘zlariga ko‘ra, shartnomani imzolaganligi uchun unga 1,2 million rubl miqdorida bir martalik to‘lov, har oy 210 ming rubl miqdorida pul taʼminoti, Rossiya fuqaroligini berish hamda bir yillik xizmatdan keyin sudlanganlikni bekor qilish vaʼda qilingan.
Jangovar harakatlarda ishtirok etish vaqtida erkak og‘ir jarohatlar olgan. Parcha tegishi oqibatida u chap ko‘zidagi ko‘rish qobiliyatini yo‘qotgan. Kasalxonaga yuborilganidan so‘ng u tibbiyot muassasasini tark etib, Moskva shahridagi O‘zbekiston elchixonasiga murojaat qilgan.
Vatanga qaytish guvohnomasini olgach, erkak O‘zbekistonga qaytgan. Sud majlisi davomida u aybini to‘liq tan olgan va suddan jazoni yengillashtirishni so‘ragan.
Sud A. M.ni O‘zbekiston Respublikasi Jinoyat kodeksining 154-moddasi 1-qismi («Yollanma jangchilik») bilan aybdor deb topib, unga uch yil muddatga ozodlikdan mahrum qilish jazosini tayinladi.
