Oʻzbekiston va Yaponiya yangi investitsiya loyihalarini muhokama qilishdi

Toshkent, O‘zbekiston (UzDaily.uz) — 25-aprel kuni O‘zbekiston investitsiyalar, sanoat va savdo vaziri Laziz Kudratov Yaponiya yoshlar palatasi (JCI) Iizuka shahri bo‘yicha maslahatchisi va "Aso Shoji" kompaniyasi prezidenti Masaxiro Aso bilan uchrashuv o‘tkazdi.

Muzokaralar davomida tomonlar O‘zbekiston va Yaponiya o‘rtasidagi savdo-iqtisodiy hamda investitsiyaviy hamkorlik barqaror sur’atlar bilan rivojlanib borayotganini alohida e’tirof etdilar.

Yaponiya O‘zbekistonning muhim va ishonchli hamkorlaridan biri ekanligi, Yaponiya ishbilarmon doiralari hamda mintaqaviy tashkilotlari bilan to‘g‘ridan-to‘g‘ri muloqotning faollashishi qo‘shma loyihalarni ilgari surish, xususan, yoshlar o‘rtasida tadbirkorlikni rivojlantirishda yangi ufqlar ochishi ta’kidlandi.

Shuningdek, "Aso Shoji" kompaniyasi bilan yangi investitsiyaviy tashabbuslarni hayotga tatbiq etish, O‘zbekiston korxonalari bilan biznes aloqalarini yo‘lga qo‘yish, ishlab chiqarishni mahalliylashtirish, texnologiyalar transferi hamda yuqori qo‘shilgan qiymatga ega loyihalarni amalga oshirish imkoniyatlari atroflicha muhokama qilindi.