O‘zgidromet 23–25 may kunlari O‘zbekistonning to‘qqiz hududida sel va toshqin xavfi bo‘yicha ogohlantirish eʼlon qildi

Toshkent, O‘zbekiston (UzDaily.uz) — O‘zgidromet 23–25 may kunlari O‘zbekistonning to‘qqiz viloyati tog‘ oldi va tog‘li hududlarida sel va toshqin hodisalari yuz berishi mumkinligidan ogohlantirdi. Bunga sabab sifatida kutilayotgan kuchli yog‘ingarchiliklar ko‘rsatildi.

Idora maʼlumotlariga ko‘ra, noqulay gidrometeorologik sharoitlar Qashqadaryo, Surxondaryo, Samarqand, Navoiy, Jizzax, Toshkent, Namangan, Farg‘ona va Andijon viloyatlarining qator tumanlariga taʼsir qilishi mumkin.

Qashqadaryo viloyatida Yakkabog‘, Dehqonobod, Chiroqchi, Kitob, Shahrisabz, Qamashi va G‘uzor tumanlari xavf hududiga kiritilgan. Surxondaryo viloyatida esa Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on va Muzrabot tumanlarida xavf yuqori baholanmoqda.

Samarqand viloyatida ogohlantirish Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy va Ishtixon tumanlariga taalluqli. Navoiy viloyatida esa Xatirchi, Navbahor, Nurota, Konimex va Karmana tumanlari xavf ostida ekani aytildi.

Jizzax viloyatida Zaomin, Baxmal, G‘allaorol, Sharof Rashidov, Forish va Yangiobod tumanlari ro‘yxatga kiritilgan. Toshkent viloyatida esa Ohangaron, Bo‘stonliq, Parkent, Piskent, O‘rtachirchiq va Yuqorichirchiq tumanlari, shuningdek Angren va Olmaliq shaharlarida sel xavfi saqlanib qolmoqda.

Namangan viloyatida Pop, Kosonsoy, Chortoq, Chust, Namangan va Yangiqo‘rg‘on tumanlarida xavf prognoz qilingan. Farg‘ona viloyatida esa So‘x, Farg‘ona, Beshariq tumanlari hamda Shohimardon hududi tilga olingan. Andijon viloyatida Andijon, Asaka, Jalolquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlari va Xonobod shahri xavfli hududlar qatorida qayd etildi.

O‘zgidromet ayrim hududlarda yomg‘ir suvlari to‘planishi va mahalliy suv bosish holatlari kuzatilishi mumkinligini ham maʼlum qildi. Tog‘li va tog‘ oldi hududlari aholisi, haydovchilar hamda dam oluvchilar ehtiyot choralariga amal qilishga chaqirildi.

Prognozga ko‘ra, dam olish kunlari mamlakatning barcha hududlarida yomg‘ir yog‘ishi, ayrim joylarda kuchli jala va momaqaldiroq kuzatilishi mumkin.