Toşkent, Özbekiston (UzDaily.uz) — O‘zbekiston terma jamoasi Chernogoriyaning Budva shahrida 19 yoshgacha bo‘lgan bokschilar o‘rtasida o‘tkazilgan jahon chempionatida sakkizta medal — to‘rtta oltin, ikkita kumush va ikkita bronza medalini qo‘lga kiritdi. Erkaklar terma jamoasi umumjamoa hisobida birinchi o‘rinni egalladi. Bu haqda O‘zbekiston boks federatsiyasi xabar berdi.
Chempionatda 69 ta mamlakatdan 474 nafar bokschi ishtirok etdi. O‘zbekistonlik yigitlar beshta medal: uchta oltin, bitta kumush va bitta bronza medaliga sazovor bo‘ldi.
75 kg gacha bo‘lgan vazn toifasida Suxrob Rahmatullayev, 90 kg gacha bo‘lgan vaznda Asadbek Sultonboyev, 90 kg dan yuqori vazn toifasida esa Islom Solihov jahon chempioni bo‘ldi. Final bahslarida ularning raqiblari eronlik Muhammad Soleh Mesbahi, ukrainalik Vladislav Naumenko va qozog‘istonlik Vladislav Samojonov bo‘ldi.
Qizlar o‘rtasida 51 kg gacha bo‘lgan vazn toifasida Nazokat Mardonova oltin medalni qo‘lga kiritdi. U finalda AQSH vakili Rubi Lopesga qarshi ringga ko‘tarildi.
Sardorbek Bahromxo‘jayev (85 kg gacha) va Maftuna Yangiyeva (70 kg gacha) kumush medallarga ega bo‘ldi. Final bahslarida ular rossiyalik Kirill Korshakov va amerikalik Marli Maknelliga mag‘lub bo‘ldi.
Zulfikor Adhamjonov (70 kg gacha) va Muxtasar Aliyeva (48 kg gacha) bronza medallarini qo‘lga kiritdi.
