O‘zbekistonda sug‘urta agentlari faoliyati qoidalari tasdiqlandi

Toshkent, O‘zbekiston (UzDaily.uz) — O‘zbekiston Respublikasi Istiqbolli loyihalar milliy agentligi sug‘urta sohasidagi normativ-huquqiy bazani takomillashtirishga qaratilgan tizimli islohotlar doirasida «Sug‘urta faoliyati to‘g‘risida»gi qonunga muvofiq Sug‘urta agentlari to‘g‘risidagi nizomni tasdiqladi.

Hujjat O‘zbekiston Respublikasi Adliya vazirligi tomonidan 2026 yil 2 iyunda 3845-son bilan davlat ro‘yxatidan o‘tkazildi.

Nizom bilan sug‘urta agentlari faoliyatini amalga oshirish tartibi, ularning sug‘urtalovchilar bilan o‘zaro munosabatlari, huquq va majburiyatlari, vositachilik faoliyati mexanizmlari, shuningdek ularning faoliyati ustidan nazorat qilish tartibi belgilab berildi.

Hujjatga muvofiq, sug‘urtalovchi va sug‘urta agenti o‘rtasidagi agentlik shartnomalarini Agentlikning Yagona avtomatlashtirilgan axborot tizimida identifikatsiya raqami (ID) berish orqali ro‘yxatdan o‘tkazish tartibi joriy etilmoqda. Shuningdek, sug‘urta agentlari faoliyatiga cheklovlar kiritiladi hamda bozordagi insofsiz ishtirokchilar reyestri shakllantiriladi.

Alohida qayd etilishicha, bank kreditlari bilan bog‘liq sug‘urta shartnomalarini tuzishda sug‘urta agentlarining ishtirokiga (banklarning o‘z tadbirkorlik tavakkalchiliklarini sug‘urtalash bundan mustasno) faqat O‘zbekiston Respublikasi rezidenti bo‘lgan sug‘urtalovchilar nomidan yo‘l qo‘yiladi.

Nizom shuningdek sug‘urta agentlari malakasini oshirish bo‘yicha talablar, sug‘urta qildiruvchilarga to‘liq maʼlumot taqdim etish majburiyatlari, shuningdek faoliyat shaffofligini taʼminlash va isteʼmolchilar huquqlarini himoya qilish choralarini nazarda tutadi.

Mazkur hujjatning qabul qilinishi sug‘urta bozorini yana-da samarali tartibga solish, uning shaffofligini oshirish hamda sug‘urta xizmatlari isteʼmolchilarining huquq va qonuniy manfaatlarini himoya qilishga qaratilgan.