O‘zbekistonda birinchi sinfga hujjat qabul qilish boshlandi

Toshkent, O’zbekiston (UzDaily.uz) — O‘zbekistonda 20 iyundan 2026/2027 o‘quv yili uchun birinchi sinfga hujjatlarni onlayn qabul qilish boshlandi. Bu haqda Maktabgacha va maktab taʼlimi vazirligi matbuot xizmati xabar qildi.

Ota-onalar arizalarni my.maktab.uz portali orqali, shuningdek my.gov.uz Yagona interaktiv davlat xizmatlari portali vositasida topshirishlari mumkin.

Hujjatlar qabuli ikki bosqichda amalga oshiriladi. Birinchi bosqich 20 iyundan 31 iyulgacha davom etadi. Bu davrda bolalarni yashash manzili bo‘yicha biriktirilgan mikrohududlar doirasidagi maktablarga qabul qilish uchun arizalar qabul qilinadi.

Ikkinchi bosqich 1 avgustdan 31 avgustgacha o‘tkaziladi. Ushbu davrda biriktirilgan mikrohududdan tashqarida yashovchi bolalar uchun arizalar qabul qilinishi ko‘zda tutilgan.

Bolalarni maktabga qabul qilish jarayoni davlat elektron platformalari orqali to‘liq onlayn shaklda tashkil etilgan.