O'zbekistonda avtomobil savdosi 3,6% ga kamaydi

Toshkent, O’zbekiston (UzDaily.uz) — 2026-yil yanvaridan iyulgacha O'zbekistonda avtomobil savdosi o'tgan yilning shu davriga nisbatan 3,6% ga kamaydi, garchi Xitoy avtomobil brendlari bozor ulushini oshirishda davom etsa ham. O'zbekiston Avtomobil biznesi assotsiatsiyasi ma'lumotlariga ko'ra, yetti oy ichida 210 837 ta avtomobil sotilgan, bu o'tgan yilga nisbatan 7 940 taga kam.

Iyul oyida 31 324 dona avtomobil sotildi. Bu iyun oyiga nisbatan 4,7% ko‘p, biroq 2025-yil iyul oyidagi ko‘rsatkichga nisbatan 30% kam.

Shu bilan birga, avtomobil bozoridagi nisbatlar ham o‘zgarib bormoqda. UzAuto Motorsning bozor ulushi bir yil ichida 81,5% dan 74,6% gacha kamaydi. ADMning bozor ulushi esa 11,3% dan 12,8% gacha oshdi. ADM portfelida Kia ulushi 0,7%, Haval 0,5% va Changan 0,3% ga oshdi. BYD esa bozor ulushini deyarli ikki baravar oshirib, 5,6% dan 10% gacha yetkazdi.

Yanvar–iyul yakunlariga ko‘ra, Xitoy avtomobil brendlarining umumiy bozor ulushi 17,8% ni tashkil etdi. O‘tgan yilning shu davrida bu ko‘rsatkich 11,6% edi.

Iyul oyida, iyunga nisbatan, Kia va BYD o‘z bozor ulushini 1,8% ga oshirishga muvaffaq bo‘ldi. Haval ulushi esa 0,4% ga oshdi. Chevrolet (-3,6%) va Chery (-0,9%) bozor ulushida eng katta qisqarishni qayd etdi.

2026-yilning asosiy tendensiyalaridan biri B-segment sedanlari savdosining qisqarishi bo‘ldi. Yanvar–iyul oylarida ushbu segmentda 70 mingdan ortiq avtomobil sotildi. O‘tgan yilning shu davrida esa bu ko‘rsatkich 87 ming donani tashkil etgan. Natijada B-segment sedanlarining bozor ulushi 40% dan 34% gacha kamaydi.

Yengil tijorat avtomobillari (LCV) segmentida ham sotuvlar hajmining qisqarishi kuzatildi. Yanvar–iyul oylarida 62,8 ming dona LCV sotilgan bo‘lsa, 2025-yilning shu davrida bu ko‘rsatkich 69,5 ming donani tashkil etgan. Natijada sotuvlar 9,6% ga qisqardi.

Shu bilan birga, B-SUV segmentidagi ixcham krossoverlarga talab ortib bormoqda. 2026-yilning dastlabki yetti oyida 47,9 ming dona B-SUV sotildi. O‘tgan yilning shu davrida bu ko‘rsatkich 37,7 ming dona edi. Natijada B-SUV segmentining bozor ulushi 5,5% ga oshib, 22,7% ga yetdi.

Umuman olganda, O‘zbekiston avtomobil bozori tarkibiy o‘zgarishlar bosqichida. Iste’molchilar orasida qimmatroq avtomobillarga bo‘lgan talab asta-sekin ortib bormoqda. Ushbu tendensiyaga avtomobil xaridini moliyalashtirish imkoniyatlarining kengayishi, moliyaviy mahsulotlarning rivojlanishi hamda aholining xarid qobiliyati oshishi kabi omillar ta’sir ko‘rsatayotgan bo‘lishi mumkin.