Toshkent, O’zbekiston (UzDaily.uz) — Raqobat qo‘mitasi Agrosanoat majmuasi ustidan nazorat inspeksiyasi bilan hamkorlikda Fondning birja savdolari orqali bug‘doy xarid qilgan va un ishlab chiqarish bilan shug‘ullanuvchi korxonalarni qayta xatlovdan o‘tkazdi.
Tekshiruv birja savdolariga talab yuqori bo‘lgan mahsulotlarni chiqarish, ularni realizatsiya qilish va narxlarni shakllantirishga taʼsir qiluvchi omillarni muntazam monitoring qilish doirasida o‘tkazildi. Xususan, gap bug‘doy va un haqida bormoqda.
Xatlov davomida mutaxassislar korxonalarning ishlab chiqarish quvvatlari, donni qayta ishlash va tayyor mahsulot ishlab chiqarish hajmlari, omborxona hamda boshqa saqlash quvvatlarini o‘rgandi. Shuningdek, muvofiqlik sertifikatlari va sanitariya-epidemiologiya xulosalari mavjudligi tekshirildi.
Tekshiruv yakunlariga ko‘ra, O‘zbekistonda un ishlab chiqarish faoliyatini amalga oshirayotgan 301 ta tadbirkorlik subyekti mavjudligi aniqlandi.
Shu bilan birga, 49 ta korxonaning o‘z ishlab chiqarish quvvatlari mavjud emas. Ular davalik xomashyosi asosida tuzilgan shartnomalar asosida faoliyat yuritmoqda. Yana 22 ta korxona vaqtincha faoliyat yuritmayotgan bo‘lsa, olti ta korxona faoliyati to‘xtatilgan.
Bundan tashqari, 42 ta korxonada muvofiqlik sertifikati mavjud emasligi, sakkizta korxonada esa sanitariya-epidemiologiya xulosasi yo‘qligi aniqlandi.
Shu tariqa, xatlov davomida yuqorida qayd etilgan nomuvofiqliklar yoki faoliyat xususiyatlariga ega 127 ta korxona aniqlandi.
Tekshiruv natijalariga ko‘ra, Raqobat qo‘mitasi birja savdolari orqali Fond bug‘doyini xarid qilgan korxonalar tomonidan mazkur bug‘doydan maqsadli foydalanilishi ustidan nazoratni kuchaytirish bo‘yicha tegishli idoralarga takliflar kiritdi.
Shuningdek, mazkur sohada amaldagi tartibga solish mexanizmlarini takomillashtirish taklif qilindi.
