O‘zbekiston va Saudiya yirik investitsiya loyihalarini muhokama qildi

Toshkent, O‘zbekiston (UzDaily.uz) — Toshkentda O‘zbekiston Bosh vazirining o‘rinbosari Jamshid Xo‘jayev va Saudiya Arabistonining qator yirik kompaniyalari, jumladan Vision Invest, Miahona, Data Volt va Saudi Tabreed vakillari ishtirokida ishchi uchrashuv bo‘lib o‘tdi. Delegatsiyaga Vision Invest prezidenti va bosh direktori Omar Al Midaniy rahbarlik qildi.

Muzokaralar davomida tomonlar O‘zbekiston iqtisodiyotining asosiy tarmoqlarini rivojlantirishga qaratilgan yirik investitsiya tashabbuslarining joriy holati va amalga oshirish istiqbollarini ko‘rib chiqdilar, shuningdek Saudiya Arabistoni bilan hamkorlikni kengaytirish masalalari muhokama qilindi.

Muhokama qilingan loyihalar keng qamrovli yo‘nalishlarni o‘z ichiga oladi. Ular orasida Toshkentda yangi xalqaro aeroport qurilishi, Farg‘onada ko‘p tarmoqli shifoxona barpo etish, suv taʼminoti tizimlari va nasos stansiyalarini modernizatsiya qilish, markazlashgan issiqlik taʼminotini rivojlantirish, shuningdek xavfli chiqindilarni qayta ishlash bo‘yicha zamonaviy quvvatlarni yaratish kabi tashabbuslar bor.

Poytaxtda yuqori texnologiyali data-markaz qurilishi loyihasiga ham alohida eʼtibor qaratildi.

Tomonlar ushbu tashabbuslar aniq amalga oshirish mexanizmiga ega bo‘lgan, yuqori investitsiya salohiyatini namoyon etuvchi va mamlakat infratuzilmasi, kommunal xo‘jaligi, raqamli iqtisodiyoti hamda ijtimoiy sohasini modernizatsiya qilishda strategik ahamiyatga ega loyihalar portfelini tashkil etishini taʼkidladilar.

Uchrashuv yakuniga ko‘ra, erishilgan kelishuvlarni yana-da ilgari surish va hamkorlikning yangi bosqichlarini amaliy jihatdan ro‘yobga chiqarishga tayyorlik tasdiqlandi.