O‘zbekiston va Albaniya birinchi xonimlari hamkorlikni muhokama qildi

Toshkent, O’zbekiston (UzDaily.uz) — Albaniya Respublikasi Prezidentining O‘zbekistonga rasmiy tashrifi doirasida “Ko‘ksaroy” qarorgohida O‘zbekiston Respublikasi Birinchi xonimi Ziroat Mirziyoyeva hamda Albaniya Respublikasi Birinchi xonimi Armanda Begay o‘rtasida uchrashuv bo‘lib o‘tdi.

Ochiq va samimiy muloqot davomida davlat rahbarlarining turmush o‘rtoqlari O‘zbekiston va Albaniya xalqlari o‘rtasidagi do‘stlik va o‘zaro anglashuvni mustahkamlash masalalari, shuningdek madaniy va gumanitar hamkorlikni kengaytirish istiqbollarini muhokama qildi.

Madaniy dastur doirasida oliymaqom mehmon o‘zbek milliy amaliy sanʼati namunalari bilan tanishdi. Jumladan, yog‘och o‘ymakorligi, qadimiy so‘zana tikish anʼanalari va kulolchilik sanʼati namunalari namoyish etildi.

Shuningdek, milliy liboslar namoyishiga ham alohida eʼtibor qaratildi, shu bilan birga O‘zbekiston madaniy merosining hududiy xususiyatlarini aks ettiruvchi «Kelin salom» marosimi ko‘rsatib berildi.

Albaniya Birinchi xonimi o‘zbek xalqining milliy anʼanalari va urf-odatlariga samimiy qiziqish bildirdi hamda ularning tarixiy chuqurligi, estetik qiymati va o‘ziga xosligini alohida taʼkidladi.