Toshkent, O’zbekiston (UzDaily.uz) — Osiyo Olimpiya kengashi (OOK) delegatsiyasi O‘zbekiston poytaxtining 2029 yilda IV Osiyo o‘smirlar o‘yinlarini o‘tkazishga tayyorgarligiga bag‘ishlangan ishchi tashrif bilan Toshkentda bo‘lib turibdi.
O‘zbekiston Milliy Olimpiya qo‘mitasida Osiyo Olimpiya kengashi vakillari bilan MOQ bosh kotibi Oybek Qosimov o‘rtasida uchrashuv bo‘lib o‘tdi. Muzokaralar davomida u bo‘lajak sport forumiga tayyorgarlikning asosiy yo‘nalishlari va uni tashkil etish rejalarini taqdim etdi.
Uchrashuv ishtirokchilari musobaqalarni o‘tkazish, shuningdek, O‘yinlar davomida foydalaniladigan sport infratuzilmasining tayyorlik holati bilan bog‘liq masalalarni ko‘rib chiqdi. Sportchilar va rasmiy delegatsiyalarning bo‘lishi uchun yaratiladigan sharoitlarga, shuningdek, Osiyo Olimpiya kengashi talablarini inobatga olgan holda tashkiliy masalalarga alohida eʼtibor qaratildi.
Tashrif doirasida Osiyo Olimpiya kengashi vakillari Olimpiya shaharchasi va Toshkentdagi Osiyo o‘smirlar o‘yinlarini o‘tkazishda foydalanish rejalashtirilgan boshqa sport obyektlariga ham tashrif buyuradi.
Delegatsiyaning ishchi safari Toshkentning O‘yinlarga tayyorgarlik jarayoni bilan tanishish va o‘zbek tomoni bilan tashkiliy masalalarni muhokama qilish imkonini beradi.
