Toshkent, O’zbekiston (UzDaily.uz) — O‘zbekiston ayollar terma jamoasi Osiyo o‘yinlarining chorak finalida Koreya Respublikasi terma jamoasiga 3:6 hisobida mag‘lub bo‘ldi.
Uchrashuvda hisob 1-daqiqadayoq ochildi — Chxve Yu-ri gol urdi. 11-daqiqada Diyora Habibullayeva muvozanatni tikladi — 1:1.
17-daqiqada Chxve Yu-ri Koreya Respublikasi terma jamoasini yana oldinga olib chiqdi. 44-daqiqada Su Chon Yun ustunlikni oshirdi, birinchi bo‘limga qo‘shib berilgan vaqtda esa yana bir gol urib, hisobni 4:1 ga yetkazdi.
Ikkinchi bo‘limda O‘zbekiston farqni qisqartirdi. 64-daqiqada Chan Se-lgi to‘pni o‘z darvozasiga kiritib qo‘ydi, ikki daqiqadan so‘ng Nilufar Qudratova O‘zbekiston terma jamoasining uchinchi golini urdi — 4:3.
74-daqiqada Su Chon Yun uchrashuvdagi uchinchi golini urib, Koreya Respublikasi ustunligini ikki to‘pga yetkazdi. Qo‘shib berilgan vaqtda Kim Min Ji yakuniy hisobni o‘rnatdi — 6:3.
O‘zbekiston ayollar terma jamoasi Osiyo o‘yinlaridagi ishtirokini chorak final bosqichida yakunladi.
