Oʻzbekiston va Yevroosiyo iqtisodiy komissiyasi yangi hamkorlik rejasini tezlashtirishga kelishib oldilar

Toshkent, O‘zbekiston (UzDaily.uz) — Joriy yilning 21-aprel kuni O‘zbekiston Investitsiyalar, sanoat va savdo vaziri Laziz Kudratov Yevroosiyo iqtisodiy komissiyasining Sanoat va agrosanoat majmuasi bo‘yicha vaziri Goar Barsegyan bilan uchrashdi.

2025-yil yakunlariga ko‘ra, O‘zbekistonning Yevroosiyo iqtisodiy ittifoqi (YeAII) mamlakatlari bilan tovar ayirboshlash hajmi 25 foizga o‘sib, 20 milliard dollardan oshdi. O‘zbekiston umumiy tashqi savdo aylanmasida YeAII ulushi qariyb 25 foizni, eksportda esa qariyb 30 foizni tashkil etdi.

YeIK bilan 2024-2026-yillarga mo‘ljallangan uch yillik Chora-tadbirlar rejasini amalga oshirish doirasida qo‘shma Ishchi guruh formatida o‘zaro hamkorlik yo‘lga qo‘yilgan.

Tomonlar 2026-2028-yillarga mo‘ljallangan yangi Rejani tayyorlash jarayonini jadallashtirishga kelishib oldilar. Joriy yilda Toshkent shahrida qo‘shma Ishchi guruhning 5-yig‘ilishini o‘tkazish rejalashtirilgan.

Muzokaralar yakunida O‘zbekistonni yangi tashkil etilgan Sanoat raqamli portali (SRP) faoliyatiga jalb etish hamda mazkur platforma doirasida hamkorlikni rivojlantirish bo‘yicha kelishuvga erishildi.