“Navoiyuran” sof foydasini 136 foizga oshirdi
Toshkent, O’zbekiston (UzDaily.uz) — Davlat korxonasi “Navoiyuran” 2026 yilning birinchi yarmi yakunlariga ko‘ra qariyb 4,3 trln so‘m sof foyda oldi. Bu o‘tgan yilning shu davridagi ko‘rsatkichdan 136,1 foizga ko‘p. 2025 yil yanvar-iyun oylarida korxonaning sof foydasi 1,8 trln so‘mni tashkil etgan. Bu haqda “Navoiyuran” maʼlumotlari dalolat bermoqda.
Hisobot davrida korxonaning sof tushumi yillik hisobda 101,8 foizga oshib, 9,7 trln so‘mga yetdi. Yalpi foyda 109,1 foizga ko‘payib, 7 trln so‘mdan oshdi.
Birinchi yarim yillik yakuniga kelib, “Navoiyuran” aktivlari 19,8 trln so‘mni tashkil etdi. Bu o‘tgan yilning mos davriga nisbatan 70,5 foizga ko‘p. Kapital 60,1 foizga oshib, 15 trln so‘mga yetdi. Taqsimlanmagan foyda esa 73,3 foizga ko‘payib, 13,3 trln so‘mni tashkil qildi.
Korxonaning so‘nggi 12 oydagi foydasi 7,9 trln so‘mni tashkil etdi. Bu bir yil avvalgi ko‘rsatkichdan 56,6 foizga ko‘p.
Shu bilan birga, hisobot davri yakuniga kelib, “Navoiyuran”ning uzoq muddatli bank kreditlari hajmi bir yil avvalgi 1,6 trln so‘mdan 3,6 trln so‘mga oshdi.
Bloomberg maʼlumotlariga ko‘ra, 2026 yilning ikkinchi yarmida “Navoiyuran” IPO‘sini o‘tkazish va kompaniya aksiyalarining 10–15 foizini joylashtirish kutilmoqda. Biroq material tayyorlangan vaqtda korxona hali davlat kompaniyasidan aksiyadorlik jamiyatiga aylantirilmagan edi.
