“Lans” Umarali Raxmonaliyev uchun taklif tayyorlamoqda
Toshkent, O’zbekiston (UzDaily.uz) — Fransiyaning “Lans” klubi Ozarbayjonning “Sabax” jamoasida to‘p tepayotgan O‘zbekiston milliy terma jamoasi 22 yoshli yarim himoyachisi Umarali Raxmonaliyevni o‘z safiga qo‘shib olishga qiziqish bildirmoqda.
Ozarbayjonning 90plus.media nashri maʼlumotlariga ko‘ra, fransuz klubi futbolchini ancha vaqtdan beri kuzatib kelmoqda va yaqin vaqt ichida “Sabax” klubiga uni transfer qilish bo‘yicha rasmiy taklif yuborishi mumkin.
Raxmonaliyev “Sabax”ning muvaffaqiyatli mavsumida muhim rol o‘ynadi. Klub Ozarbayjon chempionligi va mamlakat kubogini qo‘lga kiritdi. Yarim himoyachi shuningdek, Chempionlar ligasi saralash bosqichidagi uchrashuvlarda jamoaning asosiy futbolchilaridan biri bo‘ldi.
Xalqaro maydonda Raxmonaliyev O‘zbekiston milliy terma jamoasi sharafini himoya qiladi. Transfermarkt maʼlumotlariga ko‘ra, uning hozirgi bozor qiymati 1,2 million yevro etib baholanmoqda.
“Lans”ning Raxmonaliyevga qiziqishi klubning o‘zbek futbolchilari bilan hamkorlikdagi muvaffaqiyatli tajribasi bilan bog‘lanmoqda. Avvalroq Fransiya jamoasida O‘zbekiston terma jamoasi himoyachisi Abduqodir Husanov ham o‘ynagan va keyinchalik Angliyaning «Manchester Siti» klubiga o‘tgan.
Avvalroq “Lans”ning yana bir o‘zbekistonlik futbolchi — 19 yoshli himoyachi Behruz Karimovga ham qiziqish bildirayotgani haqida xabar berilgan edi.
Biroq Karimov allaqachon klubini o‘zgartirdi. U PFK “Surxon”dan Shveysariyaning “Lugano” klubiga o‘tib, 2031 yil 30 iyuniga qadar mo‘ljallangan besh yillik shartnoma imzoladi. Bu haqda “Lugano” xabar bergan.
Ayni paytda “Lans”ning Raxmonaliyev bo‘yicha ehtimoliy taklifi haqidagi maʼlumotlar Ozarbayjon OAV xabarlari darajasida qolmoqda. Taqdim etilgan materialda ehtimoliy transfer summasi va bitimning boshqa shartlari keltirilmagan.
