JCH-2026: Kanada Qatarni 6:0 hisobida mag‘lub etdi

Toshkent, O’zbekiston (UzDaily.uz) — Futbol bo‘yicha 2026 yilgi jahon chempionati guruh bosqichining ikkinchi tur uchrashuvida Kanada terma jamoasi Qatar terma jamoasi ustidan yirik g‘alabaga erishdi. Kanadaliklar maydonida Vankuver shahrida bo‘lib o‘tgan bahs mezbonlar foydasiga 6:0 hisobida yakunlandi.

Uchrashuvning asosiy qahramoni hujumchi Jonatan Devid bo‘ldi. U 29, 45+3 va 90+2-daqiqalarda gol urib, xet-trik qayd etdi. Shuningdek, g‘oliblar safida 16-daqiqada hisobni ochgan Kayl Larin va 64-daqiqada gol urgan Natan Saliba ham ajralib turdi. Yana bir golni Qatar futbolchisi Muhammad al-Mannai 75-daqiqada o‘z darvozasiga kiritib qo‘ydi.

Uchrashuv Osiyo terma jamoasining qattiq o‘yini bilan ham eʼtiborga tushdi. Qatar bahsni to‘qqiz nafar futbolchi bilan yakunladi. Xomam al-Amin 33-daqiqada, Assim Modibo esa 53-daqiqada maydondan chetlatildi. Oxirgi holatda futbolchi qo‘pol qoidabuzarlik qilib, Kanada yarim himoyachisi Ismael Konega jiddiy oyoq jarohati yetkazdi. Futbolchi maydondan nosilkada olib chiqildi.

Ikki turdan keyin Kanada terma jamoasi 4 ochko bilan V guruhida turnir jadvalida peshqadamga aylandi va to‘plar nisbati bo‘yicha Shveysariyani ortda qoldirdi. Bosniya va Gersegovina hamda Qatar terma jamoalari hisobida esa bir ochkodan mavjud.

Guruh bosqichining hal qiluvchi uchinchi turida 24 iyun kuni Kanada Shveysariyaga qarshi maydonga tushadi, Qatar esa Bosniya va Gersegovina bilan kuch sinashadi.

Eslatib o‘tamiz, 2026 yilgi jahon chempionati AQSH, Kanada va Meksika tomonidan birgalikda qabul qilinmoqda. Turnir tarixida ilk bor unda 48 ta milliy terma jamoa ishtirok etmoqda. Musobaqa 19 iyul kuni final bahsi bilan yakunlanadi. Amaldagi jahon chempioni Argentina terma jamoasi hisoblanadi.