Gonkongga biznes-missiya: yangi bozorlar va imkoniyatlar

Toshkent, O‘zbekiston (UzDaily.uz) — O‘zbekistonda eksport salohiyatini kengaytirish va mahalliy kompaniyalarni xorijiy bozorlarga chiqishini qo‘llab-quvvatlashga qaratilgan Gonkongga biznes-missiya tashkil etilishi eʼlon qilindi. Safar joriy yilning 4–7 may kunlari bo‘lib o‘tadi.

Missiya dasturi Gonkong tadbirkorlari bilan to‘g‘ridan-to‘g‘ri muzokaralar o‘tkazish, shuningdek mintaqaning yetakchi innovatsion va ishbilarmonlik markazlariga tashriflarni o‘z ichiga oladi. Ishtirokchilar 2001 yil texnologiyalarni rivojlantirish va innovatsion biznesni qo‘llab-quvvatlash maqsadida tashkil etilgan Hong Kong Science and Technology Park faoliyati bilan tanishish imkoniga ega bo‘ladilar.

Shuningdek, startaplar, fintex va raqamli iqtisodiyotni rivojlantirishga yo‘naltirilgan asosiy texnologik markazlardan biri hisoblangan Cyberport hamda zamonaviy texnologiyalar va innovatsion yechimlar orqali biznes samaradorligini oshirish bilan shug‘ullanuvchi Hong Kong Productivity Council ga tashriflar rejalashtirilgan.

Alohida eʼtibor Gonkongning shimoliy qismida texnologiyalar, sanoat va innovatsiyalarni rivojlantirishga qaratilgan yirik tashabbus — Northern Metropolis loyihasiga qaratiladi.

Missiya doirasida «Made in Uzbekistan» ko‘rgazmasini o‘tkazish ham rejalashtirilgan bo‘lib, unda mahalliy kompaniyalar o‘z mahsulotlarini taqdim etadi va ehtimoliy hamkorlar bilan uchrashuvlar o‘tkazadi.

Tashkilotchilar taʼkidlashicha, mazkur missiya xalqaro bozorlarga chiqish va ishbilarmonlik aloqalarini kengaytirishdan manfaatdor tadbirkorlar uchun muhim imkoniyat bo‘ladi.