Germaniya JCH-2026ni Kyurasao ustidan yirik g‘alaba bilan boshladi

Toshkent, O’zbekiston (UzDaily.uz) — Germaniya terma jamoasi futbol bo‘yicha 2026 yilgi jahon chempionatida ishonchli start olib, guruh bosqichining birinchi turida Kyurasao jamoasi ustidan yirik hisobda g‘alaba qozondi.

E guruhi doirasida Xyuston shahrida bo‘lib o‘tgan uchrashuv to‘rt karra jahon chempionlari foydasiga 7:1 hisobida yakunlandi. Germaniya jamoasi safida gollarga Feliks Nmecha, Niko Shlotterbek, Jamal Musiala, Nataniel Braun, Deniz Undav hamda dubl muallifi bo‘lgan Kay Havers mualliflik qildi.

Jahon chempionatining final bosqichida ilk bor ishtirok etayotgan Kyurasao terma jamoasining yagona golini 21-daqiqada Livano Komenensiya kiritdi.

Kyurasao jamoasi bosh murabbiyi Dik Advokat ham alohida eʼtiborga tushdi. U 78 yoshida jahon chempionatlari tarixidagi eng yoshi ulug‘ murabbiyga aylandi.

Birinchi tur yakunlariga ko‘ra, Germaniya o‘z guruhida pley-off yo‘llanmasi uchun kurashda peshqadamga chiqdi. Keyingi uchrashuvda nemislar Kot-d‘Ivuar terma jamoasiga qarshi maydonga tushadi, Kyurasao esa Ekvador bilan bahs olib boradi. Har ikki uchrashuv 20 iyun kuni bo‘lib o‘tadi.

2026 yilgi jahon chempionati futbol tarixida ilk marta 48 ta milliy terma jamoa ishtirokida AQSH, Kanada va Meksika hududida o‘tkazilmoqda. Turnir finali 19 iyul kuniga belgilangan.