Chirchiqda suv taʼminoti filiali rahbariyati jazolandi

Toshkent, O’zbekiston (UzDaily.uz) — Davlat mehnat inspeksiyasi Chirchiq shahri «Suv taʼminoti» filiali rahbariyatini mehnatni muhofaza qilish talablariga rioya etmasdan xodimlarni g‘ayrioddiy issiq sharoitida ishga jalb qilgani haqidagi holat yuzasidan maʼmuriy javobgarlikka tortdi.

Tekshiruv ijtimoiy tarmoqlarda tarqalgan tegishli xabarlardan so‘ng o‘tkazildi. Uning yakunlariga ko‘ra, 2026 yil 18 iyul kuni filialning olti nafar xodimi havo harorati yuqori bo‘lgan va mehnat sharoitlari noqulay paytda kunduzi ish bajargani aniqlangan.

Aniqlangan qonunbuzilishlar munosabati bilan filial rahbariga O‘zbekiston Respublikasining Maʼmuriy javobgarlik to‘g‘risidagi kodeksi 49-moddasi 1-qismiga muvofiq, Mehnat kodeksi, «Mehnatni muhofaza qilish to‘g‘risida»gi Qonun hamda SanQvaN 0069-24 sanitariya meʼyorlari talablariga rioya qilmaganlik uchun maʼmuriy javobgarlik chorasi qo‘llanildi.

Shuningdek, ish beruvchiga bajarilishi majburiy bo‘lgan ko‘rsatmalar berildi.

Jumladan, ishlar soat 10:00 gacha yoki 17:00 dan keyin tashkil etilishi, xodimlar ichimlik suvi, soyada dam olish joylari va shaxsiy himoya vositalari bilan taʼminlanishi, shuningdek, yuqori harorat sharoitida mehnat qilayotgan xodimlarning sog‘lig‘i ustidan doimiy nazorat o‘rnatilishi topshirildi.

Davlat mehnat inspeksiyasida taʼkidlanganidek, xodimlarning hayoti va sog‘lig‘ini taʼminlash har bir ish beruvchining birinchi navbatdagi majburiyati hisoblanadi.