Toşkent, Özbekiston (UzDaily.uz) — AQSH xalqaro aviareyslar orqali mamlakatga keluvchi barcha yo‘lovchilar, jumladan, tranzit yo‘lovchilar uchun deklaratsiya to‘ldirish talabini joriy etadi.
Yangi chora AQSH sharqiy vaqti bilan 3 noyabr kuni soat 23:59 da kuchga kiradi. Uning maqsadi Ebola virusining mamlakatga kirib kelish xavfini kamaytirishdan iborat.
Yo‘lovchilar parvozdan oldin qog‘oz yoki elektron shakldagi deklaratsiyani to‘ldirib, imzolashlari kerak bo‘ladi. Hujjatda ular parvozdan oldingi 21 kun davomida Kongo Demokratik Respublikasi (KDR) hududida bo‘lmaganini tasdiqlashlari lozim.
KDR aeroporti orqali tranzit bilan o‘tish ham yo‘lovchi mamlakat hududida bo‘lgan deb hisoblanadi. Bu hatto yo‘lovchi samolyotdan yoki aeroport binosidan chiqmagan holatlarga ham taalluqli.
18 yoshga to‘lmagan yo‘lovchilar uchun deklaratsiyani ota-onasi, vasiysi yoki boshqa vakolatli shaxs imzolashi kerak.
Parvozdan oldin to‘ldirilgan deklaratsiyani taqdim etmagan yo‘lovchilar reysga chiqarilmaydi.
Hujjat shaklini AQSHning Kasalliklarni nazorat qilish va profilaktika qilish markazlari (CDC) saytidan olish mumkin.
