Angliya va Xorvatiya JCH-2026 pley-offiga yo‘l oldi

Toshkent, O’zbekiston (UzDaily.uz) — AQSH, Kanada va Meksikada davom etayotgan 2026 yilgi futbol bo‘yicha jahon chempionatida L guruhining so‘nggi tur uchrashuvlari yakunlandi. O‘tkazilgan bahslar natijasiga ko‘ra, ushbu guruhdan uchta milliy terma jamoa pley-offning birinchi bosqichiga yo‘llanmani qo‘lga kiritdi, yana bir ishtirokchi esa sayyoramizning eng nufuzli futbol musobaqasidagi ishtirokini muddatidan avval yakunladi.

Nyu-Jersi shtatidagi Ist-Raterford shahrida Angliya terma jamoasi Panama ustidan 2:0 hisobida ishonchli g‘alabaga erishdi. Angliyalik futbolchilar uchrashuv davomida to‘liq ustunlikka ega bo‘lib, ikkinchi bo‘limda raqib darvozasini ikki marta ishg‘ol qildi. Hisob 62-daqiqada yarim himoyachi Jud Bellingem tomonidan ochildi, oradan besh daqiqa o‘tgach esa hujumchi Garri Keyn jamoasining ustunligini mustahkamladi.

Ushbu gol orqali Garri Keyn jahon chempionatlaridagi gollari sonini 11 taga yetkazib, Angliya terma jamoasi tarixida mundiallarda eng ko‘p gol urgan futbolchiga aylandi va afsonaviy Gari Linekerni ortda qoldirdi. Panama futbolchilari esa birorta ham ochko to‘play olmay, jadvalning so‘nggi pog‘onasini egalladi.

Turning Pensilvaniya shtatidagi Filadelfiya shahrida bo‘lib o‘tgan parallel uchrashuvida Xorvatiya terma jamoasi Ganani 2:1 hisobida mag‘lub etdi. Xorvatlar 31-daqiqada Petar Suchichning aniq zarbasi evaziga oldinga chiqdi. Ikkinchi bo‘lim o‘rtalarida ganalik himoyachi Derrik Lukassen muvozanatni tikladi, biroq 83-daqiqada Nikola Vlashich yevropaliklar jamoasiga g‘alaba keltirgan golga mualliflik qildi.

Yakunda Angliya 7 ochko bilan guruhda birinchi o‘rinni egalladi, Xorvatiya 6 ochko bilan ikkinchi pog‘onadan joy oldi. Gana esa mag‘lubiyatga qaramay, 4 ochko bilan uchinchi o‘rinni band etgan holda 1/16 finalga yo‘llanma oldi. Eslatib o‘tamiz, joriy turnirda ilk bor 48 ta jamoa ishtirok etmoqda va pley-offga har bir guruhdan ikkitadan eng kuchli terma jamoa hamda uchinchi o‘rinni egallaganlar orasidan eng yaxshi sakkizta jamoa chiqadi.