Andijon va Xitoy CAMCE infratuzilma loyihalarini muhokama qilishdi

Toshkent, O’zbekiston (UzDaily.uz) — V Toshkent xalqaro investitsiya forumi doirasida Andijon viloyati delegatsiyasi mintaqaviy iqtisodiyot va infratuzilmani rivojlantirishga qaratilgan xorijiy investorlar bilan bir qator uchrashuvlar o‘tkazdi.

Viloyat hokimi Shuhratbek Abdurahmonov boshchiligida China CAMCE International rahbariyati bilan uchrashuv bo‘lib o‘tdi, unda istiqbolli kommunal infratuzilma loyihalari muhokama qilindi.

Uchrashuvda Andijon viloyati shaharlari hamda aholi zich joylashgan tumanlarida zamonaviy kanalizatsiya va ichimlik suvi tarmoqlarini barpo etishga qaratilgan istiqbolli loyihalar atroflicha muhokama qilindi.

Tomonlar viloyatda amalga oshirilayotgan chiqindilarni qayta ishlash loyihasini jadallashtirish, aholining toza ichimlik suvi va muhandislik-kommunikatsiya xizmatlariga bo‘lgan ehtiyojini chuqur o‘rganish hamda mazkur yo‘nalishlarda aniq amaliy ishlarga kirishish bo‘yicha kelishuvga erishdilar.

Forum doirasida o‘tkazilayotgan bunday uchrashuvlar Andijon viloyatida zamonaviy infratuzilmani shakllantirish, aholi turmush sifatini yana-da yaxshilash va yangi investitsiya loyihalarini hayotga tatbiq etishda muhim qadam bo‘lib xizmat qilishi kutilmoqda.