Toşkent, Özbekiston (UzDaily.uz) — Özbekistonda 2026–2027 yillar kuz-qiş mavsumida tabiiy gazni aholi va ijtimoiy soha obyektlariga ustuvor tartibda yetkazib beriş belgilandi. Bu haqda Energetika vazirligi xabar berdi.
Tegişli çora-tadbirlar Vazirlar Mahkamasining qarorida nazarda tutilgan. Hujjat 2026 yil 1 oktyabrdan 2027 yil 31 martgaça amal qiladi.
Mavjud gaz resurslarini taqsimlaşda turar joylar, maktablar, bolalar boğçalari, şifoxonalar va ijtimoiy sohaga mansub boşqa muassasalarga ustuvorlik beriladi. Şuningdek, strategik ahamiyatga ega iste’molçilarni gaz bilan ta’minlaş çoralari ham belgilangan.
Gaz resurslarini taqsimlaş tartibi
Energetika vazirligi “Öztransgaz”, “Hududgazta’minot” kompaniyalari va boşqa mas’ul taşkilotlar bilan birgalikda gaz yetkazib berişning ön kunlik hamda kunlik prognoz jadvallarini işlab çiqadi.
Jadvallarni tayyorlaşda mavjud tabiiy gaz hajmlari va ob-havo şaroitlari hisobga olinadi. Hujjatlar har oyning 25-sanasidan keçiktirmay kuz-qiş mavsumiga tayyorgarlik köriş böyiça respublika komissiyasi tasdiğiga kiritilişi lozim.
Magistral gaz quvurlarida bosim pasaygan yoki mavjud resurslar hajmi kutilmaganda özgargan taqdirda, gaz taqsimoti tezkorlik bilan qayta körib çiqiladi. Bunda aholi va ijtimoiy soha obyektlarini ustuvor tartibda gaz bilan ta’minlaş saqlab qolinişi kerak.
Respublika komissiyasi hududlar va yirik ulgurji iste’molçilar kesimida keyingi oy uçun gaz yetkazib beriş jadvallarini tasdiqlaydi. Bu iş har oyning oxirgi kuniga qadar amalga oşirilişi lozim.
Qoraqalpoğiston Respublikasi Vazirlar Kengaşi, viloyatlar va Toşkent şahri hokimliklari “Hududgazta’minot”ning hududiy filiallari bilan birgalikda tasdiqlangan jadvallar asosida tuman va şaharlar böyiça gaz taqsimotini taşkil etadi. Bunda ham birinçi navbatda turar joylar va ijtimoiy muassasalarni gaz bilan ta’minlaşga e’tibor qaratiladi.
Ayrim iste’molçilar uçun vaqtinçalik çeklovlar
Havo harorati keskin pasaygan davrlarda aholi va ijtimoiy soha obyektlariga gaz yetkazib beriş barqarorligini ta’minlaş maqsadida boşqa toifadagi iste’molçilar uçun vaqtinçalik çeklovlar joriy etilişi mumkin.
Bunday çoralar belgilangan tartibda qöllaniladi.
