Uzbekistonda SSP huzurida Yuristlar assotsiatsiyasi tashkil etildi

Toshkent, O‘zbekiston (UzDaily.uz) — O‘zbekiston Savdo-sanoat palatasi huzurida mamlakat yuridik sohasi vakillarini birlashtiruvchi yangi professional platforma — Advokatlar va yuridik maslahatchilar assotsiatsiyasi rasman tashkil etildi.

Tashkilotchilar qaroriga ko‘ra, Assotsiatsiya raisi etib advokat, Jamoatchilik kengashi aʼzosi Davronbek Axmatov tayinlandi.

Tuzilmani tashkil etish advokatlar, yuridik maslahatchilar va biznes hamjamiyati o‘rtasidagi hamkorlikni mustahkamlash, shuningdek, huquq va tadbirkorlik sohasida yagona professional muloqotni rivojlantirishga qaratilgan.

Qayd etilishicha, Assotsiatsiya faoliyati advokatlar, yuristlar va yuridik konsalting kompaniyalari vakillari ishtirokida ochiq muhokamalarni yo‘lga qo‘yish bilan birga olib boriladi.

Bunday muloqotlar doirasida advokatlik amaliyotining dolzarb masalalari, tadbirkorlarning huquqiy himoyasi, shuningdek, sud va huquqni qo‘llash tizimidagi mavjud noaniqliklarni ko‘rib chiqish rejalashtirilgan.

Yangi platforma O‘zbekistonda yuridik xizmatlar sifati oshishiga va biznesning huquqiy qo‘llab-quvvatlanishini kuchaytirishga xizmat qilishi kutilmoqda.