Toshkentda taqiqlangan moddalar olib kirilishining ikki holati aniqlandi

Toshkent, O’zbekiston (UzDaily.uz) — O‘zbekistonda taqiqlangan moddalarni noqonuniy ravishda olib kirish va tashish bilan bog‘liq ikki holatning oldi olindi. Toshkent xalqaro aeroportida Urtachirchiq tumanida yashovchi, muqaddam sudlangan 24 yoshli fuqaro ushlangan. Tergov maʼlumotlariga ko‘ra, u Bangkokdan psixotrop moddalarni oziq-ovqat mahsulotlari niqobi ostida O‘zbekistonga olib kirishga uringan. Bu haqda O‘zbekiston Davlat xavfsizlik xizmati matbuot xizmati xabar berdi.

Tekshiruv vaqtida ushlangan shaxsdan 978 gramm kannabis moyi va tarkibida psixoaktiv modda bo‘lgan qariyb 500 gramm qo‘ziqorin musodara qilingan. DXX maʼlumotlariga ko‘ra, u olib kirilgan moddalarni sotishni rejalashtirgan.

Yana bir holat Toshkent viloyatida Damas avtomashinasi tekshirilgan vaqtda aniqlangan. Huquqni muhofaza qiluvchi organlar sibutramin moddasi mavjud bo‘lgan 12 992 quti qahva mahsulotini aniqlagan.

Mahsulot Uchtepa tumani va Farg‘ona viloyati Oltiariq tumanida yashovchi 39 va 37 yoshli ikki nafar erkakka tegishli bo‘lgan. Vedomstvo maʼlumotlariga ko‘ra, ular mahsulotni qo‘shni davlatdan olib kirgan va Farg‘ona viloyati hududida sotishni rejalashtirgan.

Har ikki holat bo‘yicha jinoyat ishlari qo‘zg‘atilgan. Tergov harakatlari davom etmoqda.