O‘zbekiston va Yaponiya geologiya sohasida hamkorlikni muhokama qildi

Toshkent, O’zbekiston (UzDaily.uz) — O‘zbekiston Tog‘-kon sanoati va geologiya vazirligi vakillari Yaponiyaning ITOCHU va JOGMEC kompaniyalari, shuningdek, Yaponiya Iqtisodiyot, savdo va sanoat vazirligi (METI) vakillari bilan uchrashuv o‘tkazdi. Uchrashuv vazirning birinchi o‘rinbosari Feruza Hamidova rahbarligida bo‘lib o‘tdi. Bu haqda O‘zbekiston Tog‘-kon sanoati va geologiya vazirligi xabar berdi.

Muzokaralar davomida Yaponiya tomoni O‘zbekiston va Yaponiya o‘rtasidagi strategik sheriklikning ahamiyatini taʼkidlab, geologiya va tog‘-kon-metallurgiya sanoati sohalarida hamkorlikni yana-da rivojlantirishdan manfaatdor ekanini bildirdi.

O‘zbekiston vazirligi vakillari ITOCHU, JOGMEC va boshqa Yaponiya kompaniyalarini mamlakat hududidagi istiqbolli uchastkalarni o‘zlashtirishga jalb etishga tayyor ekanini maʼlum qildi.

Shuningdek, tomonlar tegishli loyihalarga Yaponiya investitsiyalarini jalb qilish imkoniyatlarini muhokama qildi. O‘zbekiston Tog‘-kon sanoati va geologiya vazirligi ushbu sohadagi loyihalarni amalga oshirish jarayonida yapon investorlariga zarur ko‘mak va yordam ko‘rsatishga tayyorligini bildirdi.

Uchrashuv yakunlari bo‘yicha tomonlar geologiya hamda tog‘-kon-metallurgiya sanoati sohalarida amaliy hamkorlikni yana-da rivojlantirishdan manfaatdor ekanini tasdiqladi.