Toshkentda II chorakda biznes kayfiyati yaxshilandi
Toshkent, O’zbekiston (UzDaily.uz) — 2026 yilning ikkinchi choragida Toshkent shahri va Toshkent viloyatida biznes yuritish sharoitlari yaxshilanganini qayd etgan tadbirkorlar ulushi 53 foizga yetdi. Bu bir yil avvalgi ko‘rsatkichga nisbatan 3 foiz punktga ko‘p. 2025 yilning ikkinchi choragida mazkur ko‘rsatkich 50 foizni tashkil etgan. Bu haqda O‘zbekiston Respublikasi Markaziy banki tadbirkorlik faolligi bo‘yicha o‘tkazilgan so‘rovnoma natijalari asosida xabar berdi.
So‘rov natijalariga ko‘ra, buyurtmalar hajmi oshganini qayd etgan respondentlar ulushi 51 foizni tashkil etdi. 2025 yilning ikkinchi choragida bu ko‘rsatkich 47 foiz bo‘lgan. Ishlab chiqarish hajmi oshganini bildirgan tadbirkorlar ulushi 50 foizga yetdi, bir yil avval esa bu ko‘rsatkich 43 foizni tashkil etgan.
Qo‘shimcha ishchi kuchiga bo‘lgan talab oshganini tadbirkorlarning 43 foizi qayd etgan, bir yil avval bu ko‘rsatkich 41 foiz edi. Yuk tashish hajmi oshganini bildirganlar ulushi ham 43 foizni tashkil etib, 2025 yildagi 42 foizlik ko‘rsatkichdan yuqori bo‘lgan. Kredit va qarzlar bo‘yicha to‘lovlar oshganini respondentlarning 37 foizi bildirgan, bir yil avval bu ko‘rsatkich 36 foiz edi.
Korxonalarda ishlab chiqarish quvvatlaridan foydalanish darajasi o‘tgan yilning shu davriga nisbatan 18 foiz punktga oshgan.
Kelgusi chorak bo‘yicha kutilmalar ham yaxshilangan. Buyurtmalar hajmi oshishini tadbirkorlarning 51 foizi kutmoqda, 2025 yilda bu ko‘rsatkich 50 foizni tashkil etgan. Ishlab chiqarish hajmi oshishini 46 foiz tadbirkor kutmoqda, bir yil avval bu ko‘rsatkich 45 foiz bo‘lgan. Ishchi kuchiga bo‘lgan talab oshishini kutayotganlar ulushi esa 45 foizni tashkil etdi, 2025 yilda mazkur ko‘rsatkich 44 foiz edi.
So‘rov natijalariga ko‘ra, buyurtmalar hajmining asosiy o‘sishi qayta ishlash sanoati, qishloq xo‘jaligi va qurilish sohalarida kutilmoqda.
Yaqin uch yil davomida iqtisodiyot va biznes muhiti yaxshilanishiga ishonch bildirgan tadbirkorlar ulushi 82 foizni tashkil etdi. Bu 2025 yilning ikkinchi choragidagi 57 foizlik ko‘rsatkichdan 25 foiz punktga yuqori.
