Toshkentda Fransiya sanoati yutuqlari ko‘rgazmasi o‘tkaziladi

Toshkent, O‘zbekiston (UzDaily.uz) — Toshkent shahrida 6 va 7 iyun kunlari Fransiyaning O‘zbekistondagi elchixonasi tomonidan tashkil etilgan «Fransiyada ishlab chiqarilgan» ko‘rgazmasi bo‘lib o‘tadi.

Ekspozitsiya Fotosuratlar uyida joylashtiriladi va tashrif buyuruvchilarni Fransiya sanoatining yutuqlari, innovatsion ishlanmalari hamda hunarmandchilik mahorati namunalari bilan tanishtiradi.

Ko‘rgazmada zamonaviy fransuz ishlab chiqarishining imkoniyatlarini aks ettiruvchi 100 dan ortiq eksponat taqdim etiladi.

Loyiha har yili Yelisey saroyida o‘tkaziladigan keng ko‘lamli ko‘rgazmaning davomi hisoblanadi.

Tashkilotchilarning taʼkidlashicha, tadbir poytaxt aholisi va mehmonlariga fransuz mahsulotlarining eng yaxshi namunalari bilan tanishish, shuningdek, Fransiyaning turli sohalardagi zamonaviy yutuqlari haqida ko‘proq maʼlumot olish imkonini beradi.

Ko‘rgazma har ikki kunda ham soat 10:00 dan 17:00 gacha tashrif buyuruvchilar uchun ochiq bo‘ladi. Barcha mehmonlar uchun kirish bepul.