Toshkent viloyatida issiqxonalarni demontaj qilish boshlandi

Toshkent, O’zbekiston (UzDaily.uz) — Toshkent viloyatining Qibray, Toshkent, Zangiota va Yuqorichirchiq tumanlarida issiqxonalarni demontaj qilish va ularni sunʼiy isitish tizimlaridan uzish ishlari boshlandi. Ishlar maxsus komissiya tomonidan amalga oshirilmoqda.

Qayd etilishicha, kuz-qish mavsumida ayrim issiqxona xo‘jaliklari isitish uchun ko‘mir, mazut, avtomobil shinalari va boshqa turdagi yoqilg‘ilardan foydalangan. Bu esa ifloslantiruvchi moddalar chiqindilari meʼyorlarining oshib ketishiga olib kelgan. Natijada ekologik vaziyat va aholi salomatligiga salbiy taʼsir ko‘rsatilgan hamda fuqarolarning murojaatlari ko‘paygan.

Avvalroq o‘tkazilgan tekshiruvlar davomida ifloslanish manbalarini bartaraf etish bo‘yicha choralar ko‘rilgan bo‘lib, bu atmosfera havosi sifatini qisman yaxshilash imkonini bergan. O‘zbekiston Prezidenti va Vazirlar Mahkamasi qarorlari asosida endilikda issiqxonalarni isitish tizimlaridan uzish va ularni demontaj qilish jarayoni boshlandi.

Shuningdek, issiqxona xo‘jaliklarini iqlim sharoiti qulayroq hududlarga, jumladan, Surxondaryo viloyatining Sherobod tumanidagi Surxon-Agro hududiga ko‘chirish nazarda tutilgan. Tadbirkorlar uchun kreditlarni qaytarish muddatini besh yilgacha uzaytirish va uch yilgacha imtiyozli davr berish kabi qo‘llab-quvvatlash choralari belgilangan.

Bundan tashqari, 2028 yil 1 aprelga qadar issiqxonalarni ko‘chirish chog‘ida ularni demontaj qilish, tashish va qayta o‘rnatish xarajatlari har bir sotix yer maydoni uchun 500 ming so‘mgacha miqdorda qoplab beriladi.

Tadbirkorlarga issiqxonalarni ko‘chirish shartlari va mavjud qo‘llab-quvvatlash choralari tushuntirilmoqda. Shundan so‘ng issiqxonalar isitish tizimlaridan uzilmoqda va tegishli shartnomalar bekor qilinmoqda.