Toshkent viloyati shifokorlari Rossiyada malaka oshiradi
Toshkent, O’zbekiston (UzDaily.uz) — Toshkent viloyati tibbiyot muassasalarining 20 nafar shifokoridan iborat guruh malaka oshirish va tajriba almashish maqsadida Rossiyaning Moskva viloyatiga yo‘l oldi. 14 kun davomida akusher-ginekologlar, neonatologlar va pediatrlar Balashixa perinatal markazi hamda Mitiщi bolalar ko‘p tarmoqli klinik markazida taʼlim oladi. Bu haqda Toshkent viloyati hokimligi xabar berdi.
O‘quvlar Toshkent va Moskva viloyatlari tibbiyot muassasalari o‘rtasidagi hamkorlik to‘g‘risidagi memorandum doirasida o‘tkazilmoqda. Dastur davomida mutaxassislar rossiyalik hamkasblarining ish tajribasi va tibbiy yordam ko‘rsatishning zamonaviy yondashuvlari bilan tanishish imkoniyatiga ega bo‘ladi.
Pediatrlar uchun o‘quv jarayonida bolalar salomatligini muhofaza qilish, yangi tug‘ilgan chaqaloqlar va og‘ir ahvoldagi bolalarga tibbiy yordam ko‘rsatish, shuningdek, turli patologiyalarga ega bemorlarni davolash masalalariga asosiy eʼtibor qaratiladi.
Dastur xorijiy tajriba va zamonaviy tibbiy usullarni o‘rganishni, keyinchalik olingan bilimlarni Toshkent viloyati sog‘liqni saqlash muassasalarida qo‘llashni nazarda tutadi. Tajriba almashish doirasida onalik va bolalikni muhofaza qilish sohasida tibbiy yordam sifatini oshirishga alohida ahamiyat berilmoqda.
Moskva viloyati tibbiyot muassasalaridagi o‘quvlardan tashqari, Toshkent viloyati pediatrlari Rossiya Pediatrlarining VII syezdida ham ishtirok etadi.
Taʼlim dasturining tashkil etilishi ikki hudud tibbiyot muassasalari o‘rtasidagi hamkorlikning bir qismi bo‘ldi. Tashrif davomida olingan bilimlar Toshkent viloyatida tibbiy amaliyotni takomillashtirishda qo‘llanilishi rejalashtirilmoqda.
