Toshkent osmonida samolyot-laboratoriya parvozlari boshlanadi

Toshkent, O’zbekiston (UzDaily.uz) — 20 avgustdan Toshkent osmonida aeroportlarning aeronavigatsiya tizimlarini samolyot-laboratoriya yordamida rejali tekshirish parvozlari boshlanadi. Parvozlar bir necha kun davom etadi. Bu haqda O‘zbekiston Transport vazirligi matbuot xizmati “O‘zaeronavigatsiya” markaziga tayanib xabar berdi.

Poytaxt aholisidan ushbu parvozlar sababli xavotirga tushmaslik so‘raldi. Taʼkidlanishicha, parvozlar rejali tekshiruvlar doirasida amalga oshiriladi.

Samolyot ayrim hududlar ustidan bir necha marta nisbatan past balandlikda — taxminan 1000 metrda uchishi mumkin.

Tekshiruvlar aeronavigatsiya tizimlarining ishlashini baholash bilan bog‘liq. Aprel oyida “O‘zaeronavigatsiya” markazi tomonidan aerodromlarning radiotexnik vositalari va yorug‘lik-signal uskunalarini tekshirish hamda kalibrlash, shuningdek, maxsus vazifalarni bajarishga ixtisoslashgan Avion aviakompaniyasi tashkil etilgani xabar qilingan edi.

Bunday ishlar uchun Diamond DA62 MPP samolyoti xarid qilingan. U aeronavigatsiya tizimlarining xalqaro talablar va Xalqaro fuqaro aviatsiyasi tashkiloti (IKAO) standartlariga muvofiqligini baholash uchun mo‘ljallangan yuqori aniqlikdagi uskunalar bilan jihozlangan.

Avval bunday tekshiruvlarni o‘tkazish uchun Qozog‘istondan samolyot jalb qilingan. O‘z operatorining tashkil etilishi asosiy tekshiruvlarni ichki imkoniyatlar hisobidan amalga oshirish imkonini beradi.