Raqobat qo‘mitasi xususiy o‘quv markazlarini sertifikatlashni taklif qildi

Toshkent, O’zbekiston (UzDaily.uz) — O‘zbekiston Raqobatni rivojlantirish va isteʼmolchilar huquqlarini himoya qilish qo‘mitasi nodavlat taʼlim xizmatlarini ixtiyoriy sertifikatlash tizimini joriy etish, shuningdek, xususiy taʼlim tshkilotlari tomonidan pullik taʼlim xizmatlarini ko‘rsatishning yagona qoidalarini ishlab chiqishni taklif qildi.

Idora matbuot xizmati maʼlum qilishicha, so‘nggi uch yil ichida qo‘mita taʼlim sohasiga oid fuqarolarning 2070 ta murojaatini ko‘rib chiqqan. Bunda shikoyatlarning 96 foizi nodavlat taʼlim muassasalari faoliyatiga to‘g‘ri kelgan.

Murojaatlarning eng keng tarqalgan sabablari taʼlim sifati isteʼmolchilar kutgan darajaga mos kelmasligi, amalda ko‘rsatilmagan xizmatlar uchun haq undirilishi, shartnoma shartlari va mablag‘ni qaytarish tartibi haqida to‘liq maʼlumot taqdim etilmasligi, muddatli shartnomalarni bekor qilishdagi qiyinchiliklar, shuningdek, reklamada berilgan vaʼdalarning bajarilmasligi bo‘lgan.

Shikoyatlarni ko‘rib chiqish yakunlariga ko‘ra, isteʼmolchilar foydasiga taxminan 1 mlrd so‘m mablag‘ qayta hisoblab chiqildi.

Qo‘mitada qayd etilishicha, nodavlat taʼlim sohasini tartibga solishning amaldagi tizimida nazoratning yetarli mexanizmlari hamda pullik taʼlim xizmatlarini ko‘rsatish bo‘yicha yagona talablar mavjud emas. Bu esa ayrim hollarda isteʼmolchilar huquqlarining buzilishiga olib kelmoqda.

Idora taʼlim xizmatlari sifatini taʼminlash bo‘yicha xalqaro tajribani ham o‘rganib chiqqan. Unda Fransiyaning Qualiopi, Shveysariyaning eduQua va Niderlandiyaning NRTO tizimlari xususiy taʼlim tashkilotlarini auditdan o‘tkazish va sertifikatlash mexanizmlariga misol sifatida keltirilgan.

Xususiy taʼlim bozorini takomillashtirish maqsadida qo‘mita taʼlim xizmatlarini ixtiyoriy sertifikatlash tizimini joriy etish, xususiy tashkilotlar tomonidan pullik taʼlim xizmatlarini ko‘rsatish qoidalarini ishlab chiqish hamda ularning isteʼmolchilar bilan munosabatlariga nisbatan minimal talablarni belgilashni taklif qildi.

Qo‘mita fikricha, ushbu takliflarni amalga oshirish taʼlim xizmatlari sifatini oshirish, isteʼmolchilar huquqlarini himoya qilishni kuchaytirish, halol raqobatni taʼminlash va bozor ishtirokchilari uchun yagona hamda shaffof talablarni shakllantirish imkonini beradi.

Tegishli takliflar vakolatli davlat organlariga yuborilgan.