Tanzila Narbayeva «El-yurt hurmati» ordeni bilan taqdirlandi

Toshkent, O’zbekiston (UzDaily.uz) — O‘zbekiston Prezidenti Shavkat Mirziyoyev Oliy Majlis Senati raisi Tanzila Narbayevani «El-yurt hurmati» ordeni bilan taqdirlash to‘g‘risidagi farmonni imzoladi.

Farmonga muvofiq, davlat mukofoti davlat va jamoat boshqaruvi sohasidagi ko‘p yillik samarali mehnati, parlament faoliyatini rivojlantirishdagi alohida xizmatlari hamda Yangi O‘zbekistonda demokratik islohotlarni izchil amalga oshirishga qo‘shgan munosib hissasi uchun berildi.

Hujjatda Tanzila Narbayevaning milliy davlatchilikning huquqiy asoslarini mustahkamlash, inson shaʼni va qadr-qimmatini himoya qilishga qaratilgan ustuvor davlat vazifalarini amalga oshirishni taʼminlash, shuningdek, jamiyatda xotin-qizlarning o‘rni va maqomini yuksaltirishga qo‘shgan hissasi alohida qayd etilgan.

Farmon bilan, shuningdek, uning yosh avlodni Vatanga muhabbat, milliy va umuminsoniy qadriyatlarga hurmat ruhida tarbiyalash, mamlakat ijtimoiy-siyosiy hayotidagi faol ishtiroki hamda davlat hokimiyati institutlarini rivojlantirishga qo‘shgan hissasi eʼtirof etildi.

Taqdirlash O‘zbekiston Respublikasi Oliy Majlisi Senati raisi tavalludining 70 yilligi munosabati bilan amalga oshirildi.