Soliq qo‘mitasi tovarlarni markirovkalash nazoratini kuchaytirdi
Toshkent, O’zbekiston (UzDaily.uz) — O‘zbekiston Soliq qo‘mitasi soliq to‘lovchining shaxsiy kabinetidagi «Shubhali holatlar» servisini takomillashtirdi. Endi tadbirkorlar tovarlarni raqamli markirovkalash bilan bog‘liq xatolar va nomuvofiqliklarni mustaqil ravishda aniqlash hamda bartaraf etishlari mumkin. Bu haqda Soliq qo‘mitasi xabar berdi.
Shaxsiy kabinetda soliq to‘lovchilar axborot tizimi tomonidan avtomatik ravishda aniqlangan shubhali holatlarni ko‘rish va tahlil qilishlari mumkin.
«Shubhali holatlar» bo‘limida yaroqlilik muddati o‘tgan tovarlar qoldiqlari, takrorlanuvchi markirovka kodlaridan foydalangan holda mahsulotlarni sotish, shuningdek, boshqa subyekt tomonidan korxonaga tegishli mahsulotlarni sotish holatlari haqida maʼlumotlar aks etadi.
Tizim, shuningdek, kirimi haqida maʼlumot mavjud bo‘lmagan tovarlarni sotish, MXIK kodi bo‘yicha markirovka kodi bo‘lmagan markirovkalanadigan mahsulotlarni realizatsiya qilish hamda chakana savdoda ulangan 2D-skanersiz markirovkalangan mahsulotlarni sotish holatlarini aniqlaydi.
Bundan tashqari, servisda «Asl belgisi» Milliy axborot tizimida ro‘yxatdan o‘tmagan korxonalar haqidagi maʼlumotlar ham ko‘rsatiladi.
Yangilangan servisda “Validatsiya” deb nomlangan alohida bo‘lim paydo bo‘ldi. Unda «qayta sotishga urinish», yaʼni avval realizatsiya qilingan markirovka kodidan takroran foydalanish holatlari haqidagi maʼlumotlar avtomatik ravishda shakllantiriladi. Maʼlumotlar ishlab chiqaruvchilar kesimida taqdim etiladi.
Maʼlumotlarni ko‘rish uchun my.soliq.uz saytidagi shaxsiy kabinetga kirib, “Xizmatlar”, «Raqamli markirovkalangan mahsulotlar muomalasi tizimi» va «Shubhali holatlar» bo‘limlarini ketma-ket ochish kerak.
Soliq qo‘mitasi maʼlumotlariga ko‘ra, yangi funksional tadbirkorlarga tekshiruv o‘tkazilishidan oldin xatolar va nomuvofiqliklarni aniqlash hamda ularni mustaqil ravishda bartaraf etish imkonini beradi.
Shuningdek, servis bunday qoidabuzarliklarning takrorlanishining oldini olish, raqamli markirovkalash talablariga rioya qilish va vaqt hamda mablag‘ sarfini qisqartirishga yordam berishi kutilmoqda.
