Raqobat qo‘mitasi isteʼmolchilarga 16 mln so‘m qaytardi

Toshkent, O’zbekiston (UzDaily.uz) — Raqobatni rivojlantirish qo‘mitasi uy-joy qurilishi, moliya va taʼlim sohalarida ko‘rsatilgan xizmatlar bilan bog‘liq fuqarolar murojaatlarini ko‘rib chiqdi. O‘tkazilgan tekshiruvlar yakunlariga ko‘ra, murojaatchilarga pul mablag‘lari qaytarildi va ularning huquqlari tiklandi.

Farg‘ona viloyatida Farg‘ona shahrida yashovchi fuqaro kvartira xarid qilishda huquqlari buzilgani haqida murojaat qildi. Tekshiruv davomida aniqlanishicha, 110 kvadrat metr maydonli xonadon uchun shartnoma tuzilib, to‘lov to‘liq amalga oshirilgan bo‘lsa-da, kadastr hujjatlariga muvofiq kvartiraning haqiqiy maydoni 108 kvadrat metrni tashkil etgan. Natijada ortiqcha hisoblangan 2 kvadrat metr uchun to‘langan qariyb 10 mln so‘m isteʼmolchiga qaytarildi.

Toshkent viloyatida Qo‘mitaning hududiy boshqarmasi Paynet ilovasi orqali muvaffaqiyatsiz pul o‘tkazmasidan so‘ng mablag‘ini qaytara olmagan fuqaro murojaatini ko‘rib chiqdi. Shikoyat ko‘rib chiqilganidan keyin “Paynet” AJ murojaatchiga 5 mln so‘m mablag‘ni qaytarishni taʼminladi.

Yana bir murojaat Sirdaryo viloyatining Shirin shahrida yashovchi fuqarodan kelib tushdi. U «Marstiff Sat Academy» MCHJ bilan tuzilgan shartnomani bekor qilish va masofaviy taʼlim kursi uchun to‘langan mablag‘ni qaytarishda amaliy yordam so‘radi. Murojaatchiga ko‘ra, ikki oylik o‘qishdan so‘ng u ko‘rsatilgan xizmatlar sifatiga nisbatan norozi bo‘lgan.

Kompaniyaga O‘zbekiston Respublikasining «Isteʼmolchilar huquqlarini himoya qilish to‘g‘risida»gi Qonuni talablari tushuntirilganidan so‘ng shartnoma bekor qilindi va fuqaroga taʼlim uchun to‘langan 1 mln so‘mdan ortiq mablag‘ qaytarildi.