Oʻzbekiston va Gruziya qurilish sanoatida hamkorlikni kengaytiradi

Toshkent, O’zbekiston (UzDaily.uz) — “Oʻzsanoatqurilishmateriallari” uyushmasi va Xalqaro Gruziya-Oʻzbek biznes assotsiatsiyasi Tbilisida qurilish materiallari ishlab chiqarish sohasida sheriklikni rivojlantirishga qaratilgan hamkorlik memorandumini imzoladilar.

Hujjat Oʻzbekiston va Gruziya oʻrtasida savdo-iqtisodiy va investitsiyaviy hamkorlikni kengaytirishni, shuningdek, sohada qoʻshma loyihalarni amalga oshirish uchun sharoit yaratishni nazarda tutadi.

Tomonlar oʻzaro savdo va investitsiyalarni rivojlantirish, biznes forumlar, konferensiyalar va biznes uchrashuvlarini tashkil etish hamda ikki mamlakat korxonalari oʻrtasida hamkorlikni mustahkamlashga kelishib oldilar.

Memorandum shuningdek, qurilish materiallari ishlab chiqarishda qoʻllaniladigan innovatsiyalar va zamonaviy texnologiyalar boʻyicha tajriba almashishni ham koʻzda tutadi.

Hujjat 3-iyul kuni Tbilisida imzolandi va Oʻzbekiston va Gruziya oʻrtasida sanoat sohasida ikki tomonlama hamkorlikni rivojlantirishda yana bir qadamdir.