Toshkent, O’zbekiston (UzDaily.uz) — O‘zbekistonda yo‘l harakati qoidalariga rioya etilishini avtomatlashtirilgan tarzda nazorat qilish uskunalarini xarid qilish bo‘yicha boshlang‘ich qiymati 10,3 mlrd so‘m bo‘lgan tender bekor qilindi.
Bunday qaror Raqobat qo‘mitasi buyurtmachi — Telecom Soft kompaniyasi harakatlarida raqobat to‘g‘risidagi qonunchilik talablari buzilgani alomatlarini aniqlaganidan so‘ng qabul qilindi.
Idora maʼlumotlariga ko‘ra, 2026 yil 12 oktyabrda o‘tkazilgan xarid tartib-taomilini o‘rganish natijasida «Raqobat to‘g‘risida»gi qonunning 29-moddasi talablariga rioya etilmagani alomatlari aniqlangan.
Jumladan, savdolarni o‘tkazish jarayonida raqobatni cheklashi mumkin bo‘lgan harakatlar qayd etilgan.
Xarid avtomatlashtirilgan yo‘l harakati nazorati tizimlari uchun qurilmalarni sotib olishni nazarda tutgan. Holatlar o‘rganilganidan so‘ng Telecom Soft kompaniyasi o‘tkazilgan tanlovni ixtiyoriy ravishda bekor qildi.
Raqobat qo‘mitasida taʼkidlanishicha, bunday qonunbuzilishlarni aniqlash va ularning oldini olish davlat mablag‘laridan samarali hamda shaffof foydalanishni taʼminlash, shuningdek, tadbirkorlar uchun ochiq va adolatli raqobat muhitini shakllantirishga qaratilgan.
