O‘zbekistonda g‘allazorlarda 744 ta yong‘in holati aniqlandi

Toshkent, O’zbekiston (UzDaily.uz) — 2026 yil boshidan buyon O‘zbekistonda bug‘doy o‘rimidan bo‘shagan yer maydonlarida 744 ta yong‘in holati aniqlandi. Bu haqda Ekologiya qo‘mitasi xabar qildi.

Idora maʼlumotiga ko‘ra, hosil yig‘ib olingandan keyin dalalarni yoqish bilan bog‘liq qoidabuzarliklarni aniqlash ishlari aerokosmik maʼlumotlardan foydalangan holda amalga oshirilmoqda. Bunday holatlarning oldini olish maqsadida hududiy boshqarmalar tomonidan fermer xo‘jaliklariga 7 760 ta ogohlantiruv xati yuborilgan.

Nazorat tadbirlari Ekopolitsiyaning hududiy bo‘linmalari tomonidan o‘tkazildi. “Uzbekkosmos” agentligi tomonidan tayyorlangan kosmik suratlarni qayta ishlash va tahlil qilish natijasida donli ekinlar yig‘ib olingan qishloq xo‘jaligi yerlarida yong‘in sodir bo‘lgani aniqlangan.

Har bir aniqlangan holat bo‘yicha davlat inspektorlari joyiga chiqqan holda tekshiruv o‘tkazgan. To‘plangan materiallar ko‘rib chiqilishi yakunlari bo‘yicha 172 nafar qoidabuzar maʼmuriy javobgarlikka tortildi. Tayinlangan jarimalarning umumiy summasi 212,5 million so‘mni tashkil etdi.

Shuningdek, aniqlangan qoidabuzarliklar natijasida atrof-muhitga yetkazilgan zarar 652,3 million so‘mga baholandi.

Ekologiya qo‘mitasida maʼlum qilishlaricha, g‘o‘zapoya, quruq barglar, shox-shabbalar, boshqa o‘simlik qoldiqlari, shuningdek, qurilish chiqindilarini dalalar va aholi punktlarida yoqishning oldini olish bo‘yicha profilaktik va nazorat tadbirlari davomida jami 9 821 ta qoidabuzarlik aniqlangan.

Barcha holatlar bo‘yicha belgilangan tartibda tegishli maʼmuriy materiallar rasmiylashtirilgan.