Mirziyoyev Samarqandning yashil rivojlanish konsepsiyasini maʼqulladi

Toshkent, O’zbekiston (UzDaily.uz) — O‘zbekiston Prezidenti Shavkat Mirziyoyev Samarqand shahrida ekologik barqarorlikka asoslangan Green Samarkand modeli doirasida «yashil shahar» tamoyillarini joriy etish bo‘yicha takliflarni ko‘rib chiqdi. Loyiha atrof-muhitga salbiy taʼsirni kamaytirish, zamonaviy shahar infratuzilmasini rivojlantirish va iqlim siyosati yo‘nalishlarini ilgari surishga qaratilgan kompleks chora-tadbirlarni nazarda tutadi.

Asosiy yo‘nalishlardan biri sanoatni ekologik modernizatsiya qilish bo‘ladi. «Yashil sanoat zonasi» hududida eng yaxshi mavjud texnologiyalarni, Zero Visible Emission tizimlarini hamda ekologik monitoring uchun raqamli yechimlarni bosqichma-bosqich joriy etish rejalashtirilgan.

Mavjud sanoat zonalarini «yashil belbog‘lar» bilan o‘rab olish, shuningdek atrof-muhitga taʼsir darajasi bo‘yicha I va II toifaga kiruvchi hamda aholi salomatligi uchun ehtimoliy xavf tug‘diradigan sakkizta korxonani shahar tashqarisiga ko‘chirish ko‘zda tutilgan.

Loyiha doirasida 300 gektar hududda Green City Samarkand nomli yangi tuman barpo etish ham rejalashtirilgan. Bu yerda xalqaro “yashil” shaharsozlik standartlariga muvofiq turar joylar, ofislar, jamoat binolari, turistik, servis va infratuzilma obyektlari quriladi.

Chiqindilar bilan ishlash sohasida Zero Waste Samarkand konsepsiyasini amalga oshirish taklif etilmoqda. U chiqindilarni saralash va qayta ishlash tizimini joriy etish orqali poligonlarga yuboriladigan chiqindilar hajmini qisqartirishni nazarda tutadi.

Shuningdek, chiqindilarni noqonuniy tashlash holatlarini geografik bog‘langan holda foto va video qayd etadigan hamda keyinchalik ularni xaritalash imkonini beruvchi raqamli tizimni ishga tushirish rejalashtirilgan.

Iqlim siyosati doirasida 2030 va 2035 yillargacha uglerod chiqindilarini qisqartirish bo‘yicha maqsadli ko‘rsatkichlarni ishlab chiqish, shuningdek shaharning to‘liq uglerod neytralligiga erishishga qaratilgan Carbon Neutral Samarkand yo‘l xaritasini tasdiqlash belgilangan.

Ekologik va iqlim tashabbuslarini moliyalashtirish uchun Green Samarkand Climate Finance Facility platformasini tashkil etish taklif qilinmoqda. Loyihaning amalga oshirilishi ustidan nazorat va natijalarni eʼlon qilish ishlari Green Samarkand Dashboard raqamli platformasi orqali amalga oshiriladi.

Tashabbuslarning alohida qismi turizmni rivojlantirish va bioxilma-xillikni saqlashga bag‘ishlangan. Rejaga Green Samarkand brendini targ‘ib qilish, Green Hotels Samarkand reyting tizimini joriy etish, Samarkand City Biodiversity Index metodologiyasini ishlab chiqish, Urban Biodiversity Samarkand pilot loyihasini amalga oshirish hamda «Bioxilma-xillikni saqlaylik» volontyorlik dasturini yo‘lga qo‘yish kiradi.

Kutilishicha, ushbu chora-tadbirlarni amalga oshirish Samarqandni ekoturizm va barqaror shaharsozlik markaziga aylantirish, shuningdek shaharni «Markaziy Osiyoning yashil investitsiyalar va innovatsiyalar poytaxti» sifatida pozitsiyalash uchun tashkiliy, moliyaviy va amaliy asoslarni shakllantirish imkonini beradi.