O‘zbekiston va JICA Afg‘oniston bo‘yicha loyihalarni muhokama qildi

Toshkent, O‘zbekiston (UzDaily.uz) — O‘zbekiston Prezidentining Afg‘oniston bo‘yicha maxsus vakili Ismatulla Irgashev Yaponiyaning JICA agentligi Janubiy Osiyo departamenti bosh direktori Tetsuya Yamada bilan uchrashuv o‘tkazdi. Uchrashuvda tomonlar Afg‘onistonni ijtimoiy-iqtisodiy rivojlantirishga qaratilgan qo‘shma loyihalarni amalga oshirish istiqbollarini muhokama qildi.

Muzokaralar davomida taʼkidlanganidek, Afg‘oniston aholisini qo‘llab-quvvatlash, mamlakat iqtisodiyotining asosiy tarmoqlari va ijtimoiy infratuzilmasini rivojlantirishga qaratilgan tashabbuslarni ishga tushirish imkoniyatlariga alohida eʼtibor qaratildi.

Yapon tomoni vakillari O‘zbekistonning Afg‘oniston bilan hamkorlikdagi pragmatik yondashuviga yuqori baho berdi. JICA vakillari shuningdek Termiz shahrida yaratilgan infratuzilmaning ahamiyatini qayd etib, undan xalqaro gumanitar va ijtimoiy loyihalarni amalga oshirish platformasi sifatida foydalanish mumkinligini taʼkidladi.

Uchrashuv yakunlari bo‘yicha yapon tomoni taʼlim, sog‘liqni saqlash, qishloq xo‘jaligi, xususiy sektorni rivojlantirish, shuningdek, narkotik moddalarning noqonuniy aylanmasiga qarshi kurash sohalaridagi dasturlarni ilgari surish uchun Termiz imkoniyatlaridan foydalanishga qiziqish bildirdi.

Tomonlar bunday tashabbuslarni amalga oshirish Afg‘onistondagi ijtimoiy-iqtisodiy vaziyatni yaxshilash va afg‘on xalqi farovonligini oshirishga xizmat qilishini taʼkidladi.