O‘zbekiston U-17 Yemenga qarshi o‘rtoqlik o‘yini o‘tkazadi

Toshkent, O‘zbekiston (UzDaily.uz) — O‘zbekiston U-17 terma jamoasi yoshlar o‘rtasidagi Osiyo kubogiga tayyorgarlik doirasida Yemen milliy jamoasiga qarshi nazorat o‘yini o‘tkazadi.

Maʼlumki, turnir yaqin kunlarda Jidda shahrida start oladi. Dastlab O‘zbekiston terma jamoasining guruh bosqichidagi birinchi o‘yini 6 may kuniga belgilangan edi, ammo KXDR terma jamoasining musobaqada ishtirok etishdan bosh tortgani sababli taqvimga o‘zgartish kiritildi va endilikda o‘zbekistonliklar birinchi uchrashuvini 10 may kuni Hindistonga qarshi o‘tkazadi.

Taqvimga kiritilgan o‘zgartishlar munosabati bilan va futbolchilarga qo‘shimcha o‘yin amaliyotini taʼminlash, shuningdek turnirga tayyorgarlik sifatini oshirish maqsadida 29 aprel kuni Yemen terma jamoasiga qarshi nazorat uchrashuvi o‘tkazish bo‘yicha kelishuvga erishildi.

Ushbu uchrashuv rasmiy musobaqa oldidan tayyorgarlikning muhim bosqichi sifatida qaralmoqda. U murabbiylar shtabiga futbolchilarning tayyorgarlik darajasini baholash va taktik sxemalarni ishlab chiqish imkonini beradi.