O‘zbekiston U-17 terma jamoasi jahon chempionatiga chiqdi

Toshkent, O‘zbekiston (UzDaily.uz) — Saudiya Arabistonida o‘tayotgan Osiyo kubogida O‘zbekistonning 17 yoshgacha bo‘lgan o‘smirlar terma jamoasi muddatidan oldin chorak finalga yo‘l oldi va noyabr oyida Qatarda bo‘lib o‘tadigan jahon chempionati ishtirokini taʼminladi.

D guruhidagi dastlabki uchrashuvda O‘zbekiston jamoasi Hindiston termasini ishonchli tarzda 3:0 hisobida mag‘lub etdi. Hisob 32-daqiqada ochildi. Laziz Abduraimov penaltidan aniq zarba yo‘llab, jamoasini oldinga olib chiqdi. Ikkinchi bo‘limda O‘zbekistonning ustunligi hindistonlik himoyachi Vangxema Denni Singhning avtogolidan keyin yana-da oshdi. U burchak to‘pidan uzatilgan to‘pni o‘z darvozasiga kiritib qo‘ydi. Uchinchi gol muallifi Axrorbek Ravshanbekov bo‘ldi.

Bundan avval Avstraliya terma jamoasi Hindiston ustidan 4:0 hisobida g‘alaba qozongan edi. Shu tariqa, O‘zbekiston va Avstraliya jamoalari muddatidan oldin musobaqa chorak finaliga chiqish hamda U-17 jahon chempionati yo‘llanmalarini qo‘lga kiritishdi.

13 may kuni bo‘lib o‘tadigan O‘zbekiston va Avstraliya o‘rtasidagi o‘zaro bahs D guruhi g‘olibini aniqlab beradi.

Dastlab ushbu guruhda KXDR terma jamoasi ham ishtirok etishi kerak edi, ammo jamoa musobaqa boshlanishidan avval turnirni tark etgan.