Nodirbek Abdusattorov TePe Sigeman Chess turnirida uchinchi o‘rinni egalladi

Toshkent, O‘zbekiston (UzDaily.uz) — O‘zbekistonlik shaxmatchi Nodirbek Abdusattorov Shvetsiyaning Malmyo shahrida bo‘lib o‘tgan TePe Sigeman Chess 2026 musobaqasida uchinchi o‘rinni qo‘lga kiritdi. Grossmeyster turnirni mag‘lubiyatsiz yakunlab, bir g‘alaba va olti durang natijasini qayd etdi. Turnir g‘olibi Magnus Karlsen bo‘ldi.

Yakuniy tur oldidan Nodirbek Abdusattorov qo‘shimcha tay-breykda birinchi o‘rin uchun kurashish imkoniyatini saqlab turgan. Buning uchun u niderlandiyalik grossmeyster Yorden van Forestni mag‘lub etishi va boshqa partiyalar natijasini kutishi kerak edi. Biroq uchrashuv durang bilan yakunlandi. Van Forest Gryunfeld himoyasini qo‘llab, pozitsiyani tenglashgan yakunga olib keldi.

Bu durang Nodirbek Abdusattorov uchun start turidagi g‘alabadan keyingi oltinchi ketma-ket durang bo‘ldi. U Endi Vudvord va Ardjun Erigaysiga qarshi partiyalarda g‘alaba imkoniyatlariga ega bo‘lgan, ammo ustunlikni to‘liq amalga oshira olmagan. Turnir yakunlariga ko‘ra, u 2,6 reyting ochkoni yo‘qotdi va joriy onlayn reyting 2777,4 punktni tashkil etdi.

Chess.com maʼlumotlariga ko‘ra, Nodirbek Abdusattorov O‘zbekistonning birinchi raqamli shaxmatchisi maqomini saqlab qolmoqda. Uning ortidan Javohir Sindarov 2776 reyting ochko bilan joylashgan.

Yetti tur yakunlariga ko‘ra, Abdusattorov 14 yoshli turkiyalik shaxmatchi Yag‘iz Kaan Erdog‘mush bilan uchinchi o‘rinni bo‘lishdi. Yakuniy turda Erdog‘mush Magnus Karlsenga mag‘lub bo‘ldi.

Turnir g‘olibini aniqlash tay-breykka qadar davom etdi. Ardjun Erigaysi so‘nggi turga yakka peshqadam sifatida chiqqan, ammo Endi Vudvord bilan durang o‘ynadi. Magnus Karlsen esa Yag‘iz Kaan Erdog‘mushni mag‘lub etib, ochkolar bo‘yicha tenglashdi.

Tay-breykda shaxmatchilar 3+2 nazorat vaqtida ikki blis partiya o‘tkazdi. Birinchi partiyada Karlsen, ikkinchisida Erigaysi g‘alaba qozondi. Hal qiluvchi partiyada norvegiyalik grossmeyster oq figuralar bilan o‘ynab, reglamentga ko‘ra qo‘shimcha 30 soniya oldi va g‘alaba qozonib, turnirda birinchi o‘rinni egalladi.

TePe Sigeman Chess 1–7 may kunlari Malmyo shahrida o‘tkazildi. Musobaqada sakkiz nafar shaxmatchi aylana tizimida o‘zaro bellashdi. Klassik partiyalardagi vaqt nazorati 40 yurish uchun 90 daqiqa, keyin esa partiya oxirigacha 30 daqiqa va har bir yurish uchun 30 soniya qo‘shimcha vaqtdan iborat bo‘ldi.