MTZ O‘zbekistonga 2000 ta traktor to‘plamini yetkazib beradi

Toshkent, O’zbekiston (UzDaily.uz) — Minsk traktor zavodi (MTZ) 2026 yil oxiriga qadar Agromax Technic kompaniyasi bilan amalga oshirilayotgan qo‘shma loyiha doirasida O‘zbekistonga kamida 2000 ta traktor to‘plamini yetkazib berishni rejalashtirmoqda.

MTZ marketing markazining MDH mamlakatlariga mahsulotlarni ilgari surish va sotish boshqarmasi boshlig‘i o‘rinbosari Aleksandr Surovesning maʼlum qilishicha, O‘zbekiston korxonasi bazasida BELARUS traktorlarini yig‘ish ishlab chiqarishi yo‘lga qo‘yilgan.

Korxona maʼlumotiga ko‘ra, tomonlar traktorlarni sanoat usulida yig‘ish hamda quvvati 50 ot kuchidan 212 ot kuchigacha bo‘lgan texnikalar uchun BELARUS tovar belgisidan foydalanishni nazarda tutuvchi litsenziya kelishuvlarini imzolagan.

Hozirgi vaqtda O‘zbekistonda BELARUS traktorlarining 12 ta modeli sertifikatlangan. Yana bitta modelni iyul oyi oxirigacha sertifikatlash rejalashtirilgan.

Agromax Technic ishlab chiqarish maydonchasi bir smenali ish rejimida yiliga 3000 dan ortiq traktor ishlab chiqarish quvvatiga ega. Loyihani amalga oshirish O‘zbekiston va Belarus o‘rtasida qishloq xo‘jaligi mashinasozligi sohasidagi sanoat kooperatsiyasini rivojlantirishga qaratilgan.