Meksika va Janubiy Koreya JCH-2026ni g‘alaba bilan boshladi

Toshkent, O’zbekiston (UzDaily.uz) — Meksika va Janubiy Koreya terma jamoalari 2026 yilgi futbol bo‘yicha jahon chempionatidagi ishtirokini A guruhining birinchi tur uchrashuvlaridagi g‘alabalar bilan boshladi.

Turnirning ochilish o‘yinida Meksika terma jamoasi Mexikodagi “Asteka” stadionida JAR jamoasini 2:0 hisobida mag‘lub etdi. Gollarga 9-daqiqada Xulian Kinyones va 67-daqiqada Raul Ximenes mualliflik qildi. 35 yoshli hujumchi Ximenes uchun ushbu gol jahon chempionatlaridagi ilk gol bo‘ldi.

Uchrashuv ko‘plab chetlatishlar bilan yodda qoldi. 49-daqiqada JAR terma jamoasi yarim himoyachisi Sfifelo Sitxoul qizil kartochka oldi. Keyinchalik uning jamoadoshi Temba Zvane ham maydondan chetlatildi. Qo‘shimcha vaqtda esa meksikaliklar sardori Sesar Montes maydonni tark etdi.

Moskvaning “Dinamo” klubi yarim himoyachisi Luis Chaves ikkinchi bo‘limda maydonga tushdi. Shuningdek, mazkur bahs jahon chempionatlari tarixida ochilish o‘yinida hakam bir vaqtning o‘zida uchta qizil kartochka ko‘rsatgan ilk uchrashuv sifatida qayd etildi.

Meksika terma jamoasi uchun bu jahon chempionatlari ochilish o‘yinlaridagi ilk g‘alaba bo‘ldi. Bunga qadar jamoa turnirning start uchrashuvlarida yetti marta ishtirok etib, besh bor mag‘lub bo‘lgan va ikki marta durang o‘ynagan. Shuningdek, “Asteka” stadioni 1970 va 1986 yilgi mundiallardan keyin uchinchi bor jahon chempionati ochilish o‘yiniga mezbonlik qilgan tarixdagi ilk arenaga aylandi.

A guruhining yana bir uchrashuvida Janubiy Koreya terma jamoasi Gvadalaxara shahrida Chexiya jamoasi ustidan 2:1 hisobida irodali g‘alabaga erishdi. Hisobni 59-daqiqada Ladislav Kreychi kiritgan gol bilan chexlar ochgan bo‘lsa, koreyaliklar o‘yin taqdirini o‘z foydalariga hal qilishga muvaffaq bo‘ldi. 67-daqiqada Xvan In Bom, 80-daqiqada esa O Xyon Gyu gol urdi.

Birinchi tur yakunlariga ko‘ra, A guruhida Meksika va Janubiy Koreya terma jamoalari uch ochkodan jamg‘arib, peshqadamga aylandi. Ikkinchi turda meksikaliklar 19 iyun kuni Janubiy Koreya bilan kuch sinashadi. Chexiya esa 18 iyun kuni JARga qarshi maydonga tushadi.

2026 yilgi jahon chempionati tarixda birinchi marta 48 ta milliy terma jamoa ishtirokida o‘tkazilmoqda. Shuningdek, musobaqa ilk bor bir vaqtning o‘zida uch mamlakat — AQSH, Kanada va Meksikada tashkil etilmoqda. Turnir 19 iyulga qadar davom etadi. Amaldagi jahon chempioni Argentina terma jamoasi hisoblanadi.