Farg‘ona viloyati va Koyan mintaqalararo hamkorlikni kengaytiradi
Toshkent, O’zbekiston (UzDaily.uz) — Farg‘ona viloyati va Janubiy Koreyaning Koyan shahri savdo-iqtisodiy, investitsiyaviy, taʼlim va turizm sohalaridagi hamkorlikni kengaytirish niyatida. Bu masalalar Farg‘ona viloyati hokimi Xayrullo Bozorovning Koyan shahri meri Min Gyon So bilan uchrashuvida muhokama qilindi.
Uchrashuv Farg‘ona viloyati rahbarining Koreya Respublikasiga amaliy tashrifi doirasida bo‘lib o‘tdi. Ishtirokchilar o‘zaro manfaatli aloqalarni rivojlantirish va istiqbolli yo‘nalishlarda qo‘shma tashabbuslarni amalga oshirish bo‘yicha fikr almashdi.
Muzokaralar avvalida tomonlarga Farg‘ona viloyati va Koyanning iqtisodiy hamda investitsiyaviy salohiyati, infratuzilmasi, shuningdek, taʼlim, turizm va boshqa sohalarda hamkorlik qilish imkoniyatlari haqida videomateriallar namoyish etildi.
Min Gyon So Farg‘ona viloyatidan yoshlarning Chungbu universitetida tahsil olishni boshlaganini ikki hudud o‘rtasidagi munosabatlarni rivojlantirishda muhim bosqich sifatida qayd etdi. Koyan meri nafaqat taʼlim sohasida, balki iqtisodiyot, investitsiya faoliyati, biznes, turizm va boshqa yo‘nalishlarda ham hamkorlikni kengaytirishga tayyor ekanini bildirdi.
Xayrullo Bozorov Farg‘ona viloyati va Koyan o‘rtasidagi aloqalarni mustahkamlash har ikki tomon uchun yangi imkoniyatlar yaratishini taʼkidladi. Hudud rahbari takliflari orasida biznes vakillari o‘rtasida to‘g‘ridan-to‘g‘ri aloqalar o‘rnatish, delegatsiyalarning o‘zaro tashriflarini tashkil etish, aniq investitsiya va savdo loyihalarini tayyorlash, shuningdek, taʼlim muassasalari o‘rtasidagi sheriklikni yana-da rivojlantirish masalalari o‘rin oldi.
Koyan Koreya Respublikasining yirik shaharlaridan biri bo‘lib, Kyongido provinsiyasida joylashgan va Seul bilan bevosita chegaradosh. Shahar maydoni 268 kvadrat kilometrdan ortiq, aholisi esa 1,07 million kishidan ko‘p.
Shahar zamonaviy transport infratuzilmasi hamda xalqaro ko‘rgazma va kongresslar o‘tkazish bo‘yicha rivojlangan infratuzilmaga ega. Koyanda media va kreativ sanoat, turizm hamda ijtimoiy infratuzilma ham rivojlangan. Bu yerda Koreya Respublikasidagi eng yirik xalqaro ko‘rgazma va kongress majmualaridan biri — KINTEX joylashgan.
Uchrashuv yakunlari bo‘yicha tomonlar Farg‘ona viloyati va Koyan vakillari ishtirokida qo‘shma ishchi guruh tuzishga kelishib oldi.
Ishchi guruh aniq chora-tadbirlarni o‘z ichiga olgan «yo‘l xaritasi»ni ishlab chiqishi kerak. Shundan so‘ng tomonlar hamkorlikni izchil kengaytirish hamda erishilgan kelishuvlar va tashabbuslarni amaliy bosqichga o‘tkazish niyatida.
