O‘zbekistonda biznesga davlat yordami ko‘rsatishning yagona tartibi joriy etildi

Toshkent, O’zbekiston (UzDaily.uz) — O‘zbekistonda uni olish uchun bir xil sharoitlarga ega bo‘lgan xo‘jalik yurituvchi subyektlarga davlat yordami ko‘rsatishning yagona yondashuvi belgilandi. Tegishli nizom Vazirlar Mahkamasining 2026 yil 4 sentyabrdagi 462-son qarori bilan tasdiqlandi.

Hujjat normativ-huquqiy hujjatlar loyihalarini tayyorlashda davlat yordamining raqobat holatiga taʼsirini baholash tartibini belgilaydi.

Hujjatdagi asosiy qoidalardan biri «hammaga yoki hech kimga» tamoyili bo‘ldi. Belgilangan yondashuvga ko‘ra, tovar yoki moliya bozorlarida faoliyat yuritayotgan xo‘jalik yurituvchi subyektlar davlat yordamini olish uchun bir xil shartlar va mezonlarga javob bersa, ularga yordam teng shartlarda taqdim etilishi kerak. Bunday holatda ayrim oluvchilarni tanlab olishga yo‘l qo‘yilmaydi.

Shu bilan birga, davlat yordami qator ijtimoiy-iqtisodiy va tarmoq vazifalarini hal qilish uchun ko‘rsatilishi mumkin. Ular qatoriga ayrim hududlar va iqtisodiyot tarmoqlarining rivojlanish darajasini oshirish, shuningdek, innovatsion xususiyatga ega loyihalarni qo‘llab-quvvatlash kiradi.

Davlat ko‘magi choralari aholi bandligini taʼminlash va ijtimoiy ahamiyatga ega loyihalarni amalga oshirish, ilmiy-tadqiqot hamda tajriba-konstruktorlik ishlarini olib borishga ham yo‘naltirilishi mumkin.

Yana bir yo‘nalish sifatida ekologik siyosat belgilandi. Davlat yordami atrof-muhitni muhofaza qilish va mamlakatdagi ekologik vaziyatni yaxshilash uchun taqdim etilishi mumkin.

Kichik va o‘rta biznes vakillari, shuningdek, tadbirkor ayollarni qo‘llab-quvvatlash imkoniyati ham alohida nazarda tutilgan.

Davlat yordamining raqobatga taʼsirini baholash uchun masʼul vakolatli organ sifatida Raqobatni rivojlantirish va isteʼmolchilar huquqlarini himoya qilish qo‘mitasi belgilandi.

Nizom davlat ko‘magini taqdim etish va uning raqobat muhitiga ehtimoliy taʼsirini baholashda yagona yondashuvlarni belgilashga qaratilgan.