Farg‘ona turkiyalik tadbirkorlar bilan yangi loyihalarni muhokama qildi
Toshkent, O’zbekiston (UzDaily.uz) — Farg‘ona viloyati keramika, hunarmandchilik va turizm sohalarida turkiyalik tadbirkorlar bilan hamkorlikni kengaytirish niyatida.
Viloyat hokimi Xayrullo Bozorov Turkiyaning Kası Cini Seramik kompaniyasi rahbari Husamettin Sabri va Yasin Çelik Collection kompaniyasi rahbari Yasin Chelik bilan uchrashuv o‘tkazdi.
Hamkorlikning yangi yo‘nalishlari
Uchrashuvda tomonlar Farg‘ona viloyati va turkiyalik tadbirkorlar o‘rtasidagi ishbilarmonlik aloqalarini yana-da rivojlantirish, shuningdek, o‘zaro manfaatli va istiqbolli loyihalarni amalga oshirish masalalarini muhokama qildi.
Husamettin Sabri ajdodlarining vatani bo‘lgan O‘zbekistonga chuqur hurmat va mehr bildirib, mamlakat taraqqiyotiga hissa qo‘shish istagini taʼkidladi. U Farg‘ona viloyatida amalga oshirilishi mumkin bo‘lgan qator loyiha va tashabbuslarni taqdim etdi.
Rishton keramikasiga zamonaviy yondashuv
Asosiy yo‘nalishlardan biri Rishton keramika maktabining boy anʼanalarini Turkiyaning zamonaviy dizayn yechimlari va texnologiyalari bilan uyg‘unlashtirish bo‘ldi.
Xususan, tomonlar keramika sohasida mahorat maktabi va galereya tashkil etish, mahalliy hunarmandlar bilan hamkorlikni yo‘lga qo‘yish, shuningdek, turizm sohasida yangi loyihalarni amalga oshirish imkoniyatlarini muhokama qildi.
Hokimlik tomonidan qo‘llab-quvvatlash
Xayrullo Bozorov taklif etilgan tashabbuslarni qo‘llab-quvvatladi va viloyat hokimligi mavjud imkoniyatlarni o‘rganish hamda istiqbolli loyihalarni amalga oshirishda zarur amaliy ko‘mak ko‘rsatishga tayyorligini bildirdi.
Uchrashuv yakunida bildirilgan takliflarni masʼullar bilan birgalikda batafsil ishlab chiqish, shuningdek, loyihalarni amalga oshirishning tashkiliy va amaliy masalalarini o‘rganish bo‘yicha kelishuvga erishildi.
Turkiya delegatsiyasi Rishtonga tashrif buyurdi
Tashrif dasturi doirasida turkiyalik tadbirkorlar Rishton tumanida bo‘ldi.
Ular mahalliy kulol ustalarining faoliyati, Rishton keramika maktabining anʼanalari va mahalliy hunarmandlar tomonidan tayyorlanayotgan mahsulotlar bilan tanishdi.
Tumanga tashrif delegatsiyaga mahalliy keramika sanʼatining o‘ziga xos xususiyatlari va ushbu sohadagi hamkorlikni yana-da rivojlantirish salohiyati bilan bevosita tanishish imkonini berdi.
